پاکستان انٹرنیشنل ایئرلائنز کے بیڑے میں جدید بوئنگ 787 ڈریم لائنر شامل ہوگیا ہے، جو لیز معاہدے کے تحت لندن سے پرواز کرکے اتوار کو اسلام آباد پہنچ گیا۔ پی آئی اے کے مطابق یہ کسی پاکستانی ایئرلائن کے بیڑے میں اس طیارے کی پہلی شمولیت ہے۔
ترجمان پی آئی اے نے بتایا کہ طیارے کا استقبال ایئرلائن کے چیف ایگزیکٹو عامر حیات نے اپنی ٹیم کے ہمراہ اسلام آباد ایئرپورٹ پر کیا۔ جدید ٹیکنالوجی سے آراستہ اس طیارے میں دوران پرواز تفریح کی سہولت اور کشادہ و آرام دہ کیبن موجود ہیں۔
پی آئی اے کے مطابق ڈریم لائنر کی شمولیت بیڑے کو جدید بنانے اور بین الاقوامی نیٹ ورک کو مضبوط کرنے کی حکمت عملی کا حصہ ہے۔ بوئنگ 787 ایک طویل فاصلے تک پرواز کرنے والا جڑواں انجن کا حامل طیارہ ہے، جس میں 325 تک نشستوں کی گنجائش ہے۔
اس سے قبل پی آئی اے کے بیڑے میں 12 بوئنگ 777، 15 ایئربس اے 320 اور پانچ اے ٹی آر طیارے شامل تھے۔ گزشتہ ماہ ایئرلائن نے نورس اٹلانٹک ایئرویز کے ساتھ دو بوئنگ 787 ڈریم لائنرز کے لیے اے سی ایم آئی لیز معاہدہ کیا تھا، جس کے تحت طیارے کے ساتھ عملہ، دیکھ بھال اور انشورنس کی سہولیات بھی فراہم کی جائیں گی۔
ترجمان کے مطابق ڈریم لائنر کی آمد سے ایئرلائن کی توسیع کا آغاز ہوگیا ہے۔ طیارے کو پاکستان اور برطانیہ کے درمیان طویل فاصلے کی براہ راست پروازوں کے لیے استعمال کیا جائے گا، جبکہ اس سے دونوں ممالک کے مختلف مقامات کے درمیان فضائی رابطوں کو بھی تقویت ملے گی۔
یہ پیش رفت ایسے وقت میں سامنے آئی ہے جب حکومت نے گزشتہ ستمبر میں واضح کیا تھا کہ وہ سابق قومی ایئرلائن کے لیے کوئی طیارہ نہیں خرید رہی۔ دوسری جانب پی آئی اے کو گزشتہ سال دسمبر میں نجی ملکیت میں دینے کے عمل کے تحت عارف حبیب کارپوریشن کی قیادت میں کنسورشیم نے 135 ارب روپے کی سب سے بڑی بولی دے کر 75 فیصد حصص حاصل کیے تھے۔ کنسورشیم نے ایئرلائن کی آپریشنل تنظیم نو، بیڑے میں توسیع اور مسافروں کو بہتر سہولیات فراہم کرنے کا عزم ظاہر کیا تھا۔
