پاک افغان سرحد پر کشیدگی کے دوران پاک فوج نے انگور اڈہ میں افغان طالبان کی مبینہ بلااشتعال فائرنگ کے جواب میں کارروائی کرتے ہوئے متعدد چوکیوں اور فوجی تنصیبات کو نشانہ بنایا ہے۔
سیکیورٹی ذرائع کے مطابق افغان طالبان کی جانب سے سرحدی اشتعال انگیزی کے بعد پاک فوج نے بھرپور جوابی کارروائی کی، جس میں جنوبی وزیرستان اور پاراچنار سے ملحقہ علاقوں میں افغان طالبان کی متعدد چوکیاں تباہ کردی گئیں۔
ذرائع کا کہنا ہے کہ بھاری ہتھیاروں سے کی جانے والی کارروائی کے نتیجے میں افغان طالبان اہلکاروں کو اپنی پوسٹیں چھوڑ کر فرار ہونا پڑا، جبکہ متعدد اہلکاروں کی ہلاکت کی اطلاعات بھی ہیں۔
رپورٹ کے مطابق یہ کارروائی گزشتہ ہفتے ہفتے کے روز انگور اڈہ کے علاقے میں پاک افغان سرحد پر افغان طالبان کی جانب سے کی گئی فائرنگ کے جواب میں کی گئی۔ پاک فوج کی کارروائی کی ویڈیو بھی جاری کردی گئی ہے۔
تاحال افغان طالبان کی جانب سے ان دعوؤں پر کوئی ردعمل سامنے نہیں آیا۔ سیکیورٹی ذرائع کا کہنا ہے کہ سیکیورٹی فورسز ملکی دفاع اور عوام کے تحفظ کے لیے پرعزم ہیں اور قومی سلامتی پر کوئی سمجھوتہ نہیں کیا جائے گا۔
