رسلزپور: پاک بحریہ کے سربراہ ایڈمرل نوید اشرف نے کہا ہے کہ جدید اور مستقبل کی جنگوں کے تقاضوں سے نمٹنے کے لیے پاک بحریہ کی جنگی صلاحیتوں میں نمایاں اضافہ اور تبدیلیاں کی گئی ہیں، جبکہ مسلح افواج روایتی اور جدید نوعیت کے خطرات کا مقابلہ کرنے کے لیے مکمل طور پر تیار ہیں۔
پاکستان ایئر فورس اکیڈمی اصغر خان رسلزپور میں گریجویشن پریڈ سے خطاب کرتے ہوئے نیول چیف نے کہا کہ جدید جنگی ٹیکنالوجی غیر معمولی رفتار سے ترقی کر رہی ہے، جس کے باعث عسکری حکمت عملی، جنگی نظریات اور فوجی ڈھانچوں میں بڑی تبدیلیاں آرہی ہیں۔
انہوں نے کہا کہ جنگیں اب صرف روایتی میدانوں تک محدود نہیں رہیں بلکہ الیکٹرانک وارفیئر، سائبر، خلائی اور ذہنی و اطلاعاتی محاذوں تک پھیل چکی ہیں۔ خودکار نظام، مصنوعی ذہانت اور اطلاعاتی جنگ نے لڑائی کے طریقوں کو تبدیل کردیا ہے، جس کے لیے جدید ٹیکنالوجی پر مبنی جنگی چیلنجز سے نمٹنے کی نئی حکمت عملی ضروری ہے۔
مئی 2025 میں بھارت کے ساتھ ہونے والی فوجی کشیدگی کا حوالہ دیتے ہوئے ایڈمرل نوید اشرف نے کہا کہ پاکستان کی مسلح افواج نے جارحیت روکنے کی اپنی صلاحیت ثابت کی اور مخالف فریق نے سبق سیکھ لیا ہے، اسے دوبارہ آزمانا دانش مندی نہیں ہوگی۔
انہوں نے پاک فضائیہ کی کارکردگی کو سراہتے ہوئے کہا کہ مئی 2025 کے تنازع کے دوران اس کی غیر معمولی صلاحیتوں نے دنیا کو حیران کردیا۔ اس کامیابی کا سہرا ایئر چیف مارشل ظہیر احمد بابر سدھو کی قیادت اور پاک فضائیہ کی بہترین جنگی حکمت عملی کو جاتا ہے۔
نیول چیف کے مطابق پاک فضائیہ نے جنگی تاریخ میں پہلی مرتبہ کثیرالجہتی آپریشنز انجام دیے، جن میں مقامی طور پر تیار کردہ ٹیکنالوجی اور ملکی سطح پر قائم کردہ کِل چین سسٹم کو بنیادی اہمیت حاصل تھی۔ انہوں نے اسے جدید کاری اور دفاعی پیداوار میں خود انحصاری کے لیے اختیار کی گئی مؤثر حکمت عملی کا نتیجہ قرار دیا۔
انہوں نے کہا کہ بری فوج کی زمینی طاقت، پاک بحریہ کی سمندری صلاحیت اور پاک فضائیہ کی کثیرالجہتی کارروائیوں کی استعداد نے پاکستان کی مسلح افواج کو ہر قسم کی جارحیت روکنے کے قابل بنایا ہے۔ ان صلاحیتوں کا مظاہرہ مئی 2025 کے معرکہ حق کے دوران بھی کیا گیا۔
ایڈمرل نوید اشرف نے دفاعی شعبے میں ہونے والی پیشرفت کا ذکر کرتے ہوئے کہا کہ جدید جنگی جہازوں، ہنگور کلاس آبدوزوں، مقامی طور پر تیار کردہ طویل فاصلے تک مار کرنے والے ہتھیاروں اور بغیر پائلٹ نظام کو دفاعی صلاحیتوں کا حصہ بنایا جا رہا ہے۔ اس کے علاوہ پاکستان میری ٹائم سائنس اینڈ ٹیکنالوجی پارک کا قیام بھی اہم پیشرفت ہے۔
انہوں نے کہا کہ معرکہ حق کے دوران پاک بحریہ نے بھارتی بحریہ کو سمندر میں کسی بھی جارحانہ کارروائی سے باز رکھا اور اسے پورے تنازع کے دوران دور رکھا۔
نیول چیف نے مشرقِ وسطیٰ میں کشیدگی کے بعد مارچ میں شروع کیے گئے آپریشن محافظ البحر کا بھی ذکر کیا، جس کا مقصد پاکستان کی سمندری تجارتی گزرگاہوں اور مواصلاتی راستوں کو محفوظ بنانا تھا۔ ان کا کہنا تھا کہ یہ آپریشن کامیابی سے جاری ہے۔
پاک بحریہ اور پاک فضائیہ کے درمیان دیرینہ تعاون کا ذکر کرتے ہوئے انہوں نے کہا کہ دونوں ادارے ایک دوسرے کے ساتھ مل کر کام کرنے کی تاریخ رکھتے ہیں اور سمندری حدود ان کا مشترکہ آپریشنل میدان ہے۔ دونوں افواج ملک کے دفاع کے لیے مل کر اپنی ذمہ داریاں ادا کریں گی۔
علاقائی اور عالمی صورتحال پر بات کرتے ہوئے ایڈمرل نوید اشرف نے کہا کہ خصوصاً مشرقِ وسطیٰ میں بڑھتی ہوئی کشیدگی اور بدلتی ہوئی جغرافیائی سیاسی صورتحال نے سکیورٹی کے متعدد چیلنجز پیدا کردیے ہیں۔ ان حالات میں مسلسل نگرانی، دوراندیشی اور آپریشنل تیاری ناگزیر ہے تاکہ روایتی، غیر روایتی اور غیر متناسب خطرات کا مؤثر مقابلہ کیا جاسکے۔
گریجویشن پریڈ سے خطاب میں نیول چیف نے کامیاب تربیت مکمل کرنے والے کیڈٹس کو مبارک باد دی اور ان کی کارکردگی کو سراہا۔ انہوں نے والدین اور اہل خانہ کی قربانیوں اور تعاون کو بھی خراجِ تحسین پیش کیا، جبکہ تلوارِ اعزاز اور دیگر اعزازات حاصل کرنے والے کیڈٹس کو خصوصی مبارک باد دی۔
انہوں نے قائداعظم محمد علی جناح کے فضائیہ سے متعلق پیغام کا حوالہ دیتے ہوئے کہا کہ ایک مضبوط فضائیہ کے بغیر کوئی ملک جارحیت کا آسان ہدف بن سکتا ہے۔ قائداعظم نے پاک فضائیہ کو ایک مؤثر اور کسی سے کم نہ ہونے والی فورس بنانے کا تصور دیا تھا، جسے فضائیہ نے گزشتہ 78 برس کے دوران برقرار رکھا ہے۔
نیول چیف نے فارغ التحصیل کیڈٹس پر زور دیا کہ وہ پاک فضائیہ کی روایات، قربانی، بہادری، پیشہ ورانہ مہارت اور مسلسل ترقی کے ورثے کو آگے بڑھائیں۔ ان کا کہنا تھا کہ ان کی کامیابی کا انحصار مسلسل محنت، عزم اور پیشہ ورانہ صلاحیتوں میں بہتری پر ہوگا۔
انہوں نے کہا کہ نئے افسران کو دیانت داری، اعلیٰ کارکردگی اور ٹیم ورک کو اپنی پیشہ ورانہ زندگی کا بنیادی اصول بنانا چاہیے، کیونکہ جدید دور کے پیچیدہ چیلنجز سے نمٹنے کے لیے ان خصوصیات کی اہمیت پہلے سے زیادہ بڑھ گئی ہے۔
خطاب کے اختتام پر ایڈمرل نوید اشرف نے کہا کہ پاکستان ایک امن پسند ملک ہے اور خطے میں تحمل، مذاکرات، سفارت کاری، استحکام اور عالمی امن کو ترجیح دیتا ہے، تاہم ملکی دفاع کے لیے اپنی صلاحیتوں سے بھی پوری طرح آگاہ ہے۔
انہوں نے کہا کہ پاکستان اور اس کی مسلح افواج نے امن کے حصول کے لیے بے مثال قربانیاں دی ہیں اور خطے میں استحکام کے قیام تک اپنی کوششیں جاری رکھیں گی۔