پاکستان نے مشرقِ وسطیٰ میں جاری کشیدگی کے حل کے لیے مذاکرات کو بنیادی اہمیت دیتے ہوئے خبردار کیا ہے کہ اگر سفارتی کوششیں ناکام ہوئیں اور فوجی تصادم کی صورت پیدا ہوئی تو مکہ دفاعی اتحاد اجتماعی دفاعی صلاحیت کو فعال کرسکتا ہے۔ ڈی جی آئی ایس پی آر لیفٹیننٹ جنرل احمد شریف چوہدری نے واضح کیا کہ اتحاد کا مقصد جارحیت نہیں بلکہ خطے میں امن و سلامتی کا تحفظ ہے۔
ایک عرب ٹیلی وژن چینل کو انٹرویو دیتے ہوئے ترجمان پاک فوج نے پاکستان، سعودی عرب اور ترکیہ کے مشترکہ دفاعی معاہدے میں ہونے والی پیش رفت پر گفتگو کی۔ ان کے مطابق مکہ معاہدے نے مختصر وقت میں پیش رفت کی ہے اور یہ تینوں ممالک کے درمیان مشترکہ سوچ اور علاقائی سلامتی کے لیے مشترکہ عزم کی عکاسی کرتا ہے۔
لیفٹیننٹ جنرل احمد شریف چوہدری نے کہا کہ جاری مذاکرات کے نتیجہ خیز ہونے کی ضرورت ہے تاکہ خطے میں کشیدگی کو مزید بڑھنے اور بڑے تصادم میں تبدیل ہونے سے روکا جاسکے۔ انہوں نے وضاحت کی کہ اگر سفارتی کوششیں ناکام ہوئیں اور اس کے بعد فوجی محاذ آرائی کی صورت پیدا ہوئی تو اجتماعی دفاعی صلاحیت کو بروئے کار لایا جاسکتا ہے۔
ترجمان پاک فوج کے مطابق پاکستان، سعودی عرب اور ترکیہ خطے میں امن، استحکام اور خوشحالی کے خواہاں ہیں۔ ان کا کہنا تھا کہ مکہ دفاعی اتحاد کسی مخصوص ملک کو ہدف بنانے کے لیے قائم نہیں کیا گیا، بلکہ اس کا مقصد علاقائی سلامتی کو مضبوط بنانا اور بڑھتی ہوئی کشیدگی کے دوران استحکام کے فروغ میں کردار ادا کرنا ہے۔
انہوں نے مسلم ممالک کے درمیان تنازع کے بجائے اتحاد اور یکجہتی کی ضرورت پر بھی زور دیا۔ ان کے بیان میں سفارتی حل کو ترجیح دینے کے ساتھ مشترکہ دفاع کے عزم کو بھی نمایاں کیا گیا، تاکہ مشرقِ وسطیٰ میں جاری کشیدگی وسیع تر علاقائی تصادم کی شکل اختیار نہ کرے۔
