کراچی: پاکستان پیپلز پارٹی کے چیئرمین بلاول بھٹو زرداری نے موجودہ معاشی بحران سے نمٹنے کے لیے ملک میں سیاسی ری سیٹ کی ضرورت پر زور دیتے ہوئے کہا ہے کہ تمام سیاسی جماعتوں کو باہمی اختلافات اور محاذ آرائی ختم کرکے عوام کو ریلیف فراہم کرنے کے لیے مشترکہ کوششیں کرنا ہوں گی۔ انہوں نے وزیراعظم شہباز شریف سے اتحادی جماعتوں کے ساتھ ساتھ اپوزیشن کا اعتماد بحال کرنے کا مطالبہ بھی کیا۔
کراچی میں سیلاب متاثرین کے لیے 10 لاکھ گھروں کی منتقلی کی تقریب سے خطاب کرتے ہوئے بلاول بھٹو زرداری نے کہا کہ پاکستان سمیت پوری دنیا معاشی مشکلات سے گزر رہی ہے اور ان حالات کا مقابلہ کرنے کے لیے سیاسی جماعتوں کو ایک دوسرے سے لڑنے کے بجائے مل کر کام کرنا ہوگا۔
انہوں نے وزیراعظم کو مخاطب کرتے ہوئے کہا کہ وہ پہلے اپنے اتحادیوں کا اعتماد بحال کریں اور اس کے بعد اپوزیشن جماعتوں کے ساتھ نئے تنازعات پیدا کرنے کے بجائے انہیں بھی اعتماد میں لیں۔ بلاول بھٹو نے امید ظاہر کی کہ اتحادی جماعتوں کے ساتھ اپوزیشن کو بھی معاشی بحران سے نمٹنے کی مشترکہ کوششوں میں شامل کیا جاسکے گا۔
چیئرمین پیپلز پارٹی نے سندھ میں سیلاب متاثرین کے لیے 10 لاکھ گھروں کی فراہمی کو تاریخی اقدام قرار دیتے ہوئے کہا کہ اس منصوبے کے ذریعے 10 لاکھ خاندانوں کو اپنی زمین کا مالک بنایا گیا ہے۔ ان کے مطابق یہ 1970 کے بعد پاکستان میں زمینوں کی منتقلی کا سب سے بڑا اقدام ہے۔
بلاول بھٹو نے کہا کہ سندھ نے تباہ کن سیلاب کا سامنا کیا جس کے نتیجے میں لاکھوں افراد بے گھر ہوئے۔ متاثرہ خاندانوں کی بحالی کے لیے حکومت نے بڑے پیمانے پر رہائشی منصوبہ شروع کیا، جس کے تحت 10 لاکھ گھروں کا منصوبہ مکمل کیا گیا جبکہ مجموعی طور پر 20 لاکھ گھر بنانے کا ہدف مقرر کیا گیا ہے۔
انہوں نے بتایا کہ یہ منصوبہ سندھ حکومت، وفاقی حکومت اور عالمی اداروں کے تعاون سے مکمل ہوا۔ ان کا کہنا تھا کہ اس کا مقصد صرف متاثرین کو چھت فراہم کرنا نہیں بلکہ انہیں زمین کی ملکیت دے کر مستقل سماجی اور معاشی تحفظ فراہم کرنا بھی ہے۔
چیئرمین پیپلز پارٹی نے منصوبے کی شفافیت کا دفاع کرتے ہوئے دعویٰ کیا کہ اس میں ایک روپے کی بھی کرپشن نہیں ہوئی۔ انہوں نے کہا کہ اگر کسی بین الاقوامی ادارے سے اس منصوبے کی تحقیقات کرائی جائیں تو بھی بدعنوانی ثابت نہیں ہوگی۔
بلاول بھٹو نے کہا کہ بعض سیاستدانوں کی ترجیح امیر طبقے کو مزید فائدہ پہنچانا ہے، جبکہ پیپلز پارٹی کی کوشش غریب اور کمزور طبقات کو معاشی طور پر مضبوط بنانا ہے۔ انہوں نے دوسرے صوبوں کو بھی سندھ کے عوامی فلاحی منصوبوں سے سیکھنے کا مشورہ دیا۔
انہوں نے وزیراعظم شہباز شریف کا تعاون پر شکریہ ادا کرتے ہوئے کہا کہ وفاقی حکومت کی معاونت سے سیلاب متاثرین کے لیے گھروں کا منصوبہ مکمل کرنا ممکن ہوا۔ بلاول بھٹو نے ماضی کی وفاقی حکومت کے رویے پر تنقید کرتے ہوئے کہا کہ اس وقت سندھ کو مطلوبہ تعاون فراہم نہیں کیا گیا تھا۔
بلاول بھٹو زرداری نے مزید کہا کہ شدید مہنگائی اور معاشی مشکلات کے باوجود عوامی فلاح کے منصوبے جاری رکھنا ضروری ہے، کیونکہ حکومتوں اور سیاسی جماعتوں کی بنیادی ذمہ داری عوام کو ریلیف دینا اور ان کی زندگی بہتر بنانا ہے۔
