عالمی منڈی میں خام تیل کی قیمتوں میں کمی ریکارڈ کی گئی ہے، جہاں سپلائی بہتر بنانے کے ممکنہ اقدامات اور تیل کی ترسیل پر پابندیوں میں نرمی سے متعلق اطلاعات نے قیمتوں پر اثر ڈالا ہے۔ دوسری جانب مشرق وسطیٰ میں سیکیورٹی خدشات کے باعث عالمی توانائی کی فراہمی سے متعلق غیر یقینی صورت حال برقرار ہے۔
رپورٹس کے مطابق برینٹ خام تیل کے مستقبل کے سودوں کی قیمت 41 سینٹ، یعنی 0.39 فیصد کمی کے بعد 105.51 ڈالر فی بیرل ہوگئی۔ امریکی خام تیل ویسٹ ٹیکساس انٹرمیڈیٹ (ڈبلیو ٹی آئی) کی قیمت بھی 54 سینٹ، یعنی 0.55 فیصد کم ہوکر 97.43 ڈالر فی بیرل پر آگئی۔
خام تیل کی قیمتوں میں کمی ایسے وقت میں سامنے آئی ہے جب بین الاقوامی توانائی ایجنسی نے عالمی سپلائی پر دباؤ کم کرنے کے لیے ہنگامی ذخائر سے تیل جاری کرنے کے منصوبے کے تحت دو کروڑ بیرل سے زائد ڈیزل اور دیگر تیل کی فراہمی پر اتفاق کیا ہے۔
اطلاعات کے مطابق امریکی صدر ڈونلڈ ٹرمپ کی انتظامیہ تیل کی ترسیل کے اخراجات کم کرنے کے لیے بعض ایسے جہازوں پر پابندیوں میں نرمی پر غور کر رہی ہے جو روس، ایران اور وینزویلا سمیت مختلف ممالک سے تیل منتقل کرتے رہے ہیں۔
دوسری جانب آبنائے ہرمز کے قریب تجارتی جہازوں پر حملوں کی اطلاعات اور سعودی عرب و یمن کے حوثیوں کے درمیان بڑھتی کشیدگی کے باعث عالمی توانائی کی فراہمی سے متعلق خدشات برقرار ہیں۔
ماہرین کی توجہ اب اس بات پر مرکوز ہے کہ تیل کی ترسیل میں ممکنہ بہتری اور مشرق وسطیٰ کی سیکیورٹی صورت حال آنے والے دنوں میں عالمی منڈی میں قیمتوں کا رخ کس طرح متعین کرتی ہے۔
