ماسکو: قطر کے امیر شیخ تمیم بن حمد آل ثانی اور ایرانی صدر مسعود پزشکیان نے ماسکو میں گیس برآمد کرنے والے ممالک کے فورم کے سربراہی اجلاس کے موقع پر ملاقات کی، جس میں توانائی کے شعبے میں تعاون بڑھانے کے امکانات پر تبادلہ خیال کیا گیا۔
عالمی خبر رساں ادارے کے مطابق ملاقات میں دونوں رہنماؤں نے توانائی کے شعبے میں دوطرفہ تعاون کو وسعت دینے کے امکانات کا جائزہ لیا۔ تاہم، ملاقات کے دوران زیر غور مخصوص منصوبوں یا کسی نئے معاہدے کی تفصیلات جاری نہیں کی گئیں۔
امیر قطر نے کہا کہ گیس برآمد کرنے والے ممالک کا فورم عالمی توانائی منڈی کو درپیش چیلنجز پر گفتگو اور باہمی تعاون مضبوط بنانے کا اہم موقع فراہم کرتا ہے۔ انہوں نے سوشل میڈیا پر اپنے پیغام میں گیس پیدا کرنے والے ممالک کے درمیان بہتر رابطہ کاری کی ضرورت پر زور دیا۔
شیخ تمیم بن حمد آل ثانی کے مطابق قطر مائع قدرتی گیس (ایل این جی) کی صنعت میں اپنے نمایاں کردار کے ذریعے عالمی توانائی تحفظ کی حمایت جاری رکھے گا۔ انہوں نے کہا کہ قطر اعتماد اور مشترکہ مفادات کی بنیاد پر اپنی شراکت داریاں مزید مضبوط بنانے کے لیے پُرعزم ہے۔
قطر دنیا کے اہم ایل این جی برآمد کنندگان میں شامل ہے، جبکہ ایران کے پاس بھی قدرتی گیس کے بڑے ذخائر موجود ہیں۔ خطے میں جاری کشیدگی اور آبنائے ہرمز کے حوالے سے خدشات کے باعث توانائی کی محفوظ ترسیل اور عالمی منڈیوں کا استحکام مزید اہمیت اختیار کر گیا ہے۔
