اسلام آباد: بجلی چوری کے باعث پورے علاقوں کی بجلی بند کرنے کے بجائے حکومت نے اب کارروائی کا دائرہ محدود رکھنے کا فیصلہ کیا ہے، جس کے تحت چوری والے ٹرانسفارمر کو ہی بند کیا جائے گا تاکہ قانون کی پابندی کرنے والے صارفین کو غیرضروری بجلی بندش کا سامنا نہ کرنا پڑے۔
قومی اسمبلی کی قائمہ کمیٹی برائے توانائی کو بریفنگ دیتے ہوئے وفاقی وزیر توانائی اویس لغاری نے بتایا کہ ملک میں بجلی کے تقریباً 14 ہزار فیڈرز ہیں، جن میں سے تقریباً 3 ہزار 500 فیڈرز بجلی چوری اور لائن لاسز کی وجہ سے لوڈشیڈنگ کا سامنا کر رہے ہیں۔
وفاقی وزیر کے مطابق نئے نظام کے تحت ملک بھر کے ٹرانسفارمرز پر بجلی بند اور بحال کرنے کا انتظام متعارف کرایا جائے گا۔ اس طرح جہاں بجلی چوری یا خلاف ورزی کی نشاندہی ہوگی، صرف متعلقہ ٹرانسفارمر کی بجلی بند کی جاسکے گی اور پورے فیڈر کو بند کرنے کی ضرورت نہیں رہے گی۔
اویس لغاری نے بجلی کے نظام میں موجود خامیوں اور عملے کی مبینہ غفلت کا بھی ذکر کرتے ہوئے کہا کہ بعض مقامات پر طلب کو کم ظاہر کرنے کی وجہ سے تقسیم کار نظام پر اصل ضرورت سے زیادہ بوجھ پڑتا ہے۔
انہوں نے بتایا کہ نئے نظام کا باقاعدہ ضابطہ آئندہ سال اپریل یا مئی تک تیار کیے جانے کی توقع ہے۔ حکومت کا کہنا ہے کہ اس طریقہ کار سے بجلی چوری کے خلاف کارروائی کو زیادہ ہدفی بنایا جاسکے گا اور غیرمتعلقہ صارفین کی بجلی بند ہونے سے بچایا جاسکے گا۔
