لاہور: کراچی سے لاہور آنے والی 33 اپ عوام ایکسپریس جیا بگا کے قریب حادثے کا شکار ہوگئی، جہاں ٹرین کی ایک بوگی پٹڑی سے اترنے کے باعث اپ ٹریک پر ریل گاڑیوں کی آمدورفت عارضی طور پر معطل ہوگئی۔
ریلوے حکام کے مطابق عوام ایکسپریس جیا بگا کے قریب پہنچی تو ٹرین کی ایک بوگی پٹڑی سے اتر گئی۔ حادثے کے بعد ریلوے انتظامیہ نے فوری طور پر متاثرہ ٹریک پر ٹرینوں کی آمدورفت روک دی تاکہ کسی مزید حادثے سے بچا جاسکے۔
واقعے کے بعد ریلوے کی متعلقہ ٹیمیں موقع پر پہنچ گئیں اور پٹڑی سے اترنے والی بوگی کو ہٹانے اور ریلوے ٹریک کو بحال کرنے کے لیے امدادی و بحالی کا کام شروع کردیا گیا۔
ٹریک متاثر ہونے کے باعث اپ روٹ پر چلنے والی دیگر ٹرینوں کو بھی مشکلات کا سامنا کرنا پڑا، جبکہ ریلوے حکام کی جانب سے ٹرینوں کی آمدورفت معمول پر لانے کے لیے اقدامات جاری ہیں۔
حادثے کی وجہ فوری طور پر سامنے نہیں آسکی، جبکہ ریلوے حکام کی جانب سے واقعے کی مزید تفصیلات اور کسی جانی یا مالی نقصان سے متعلق معلومات فراہم کیے جانے کا انتظار ہے۔
مسافروں کو ہدایت کی گئی ہے کہ وہ ٹرینوں کی روانگی اور آمد سے متعلق تازہ صورتحال کے لیے ریلوے حکام سے رابطے میں رہیں۔
