پاؤں اور ٹخنوں میں سوجن اور بھاری پن روزمرہ زندگی میں خاصی تکلیف کا باعث بن سکتا ہے، تاہم ماہرین صحت کے مطابق ٹانگوں کو چند منٹ کے لیے دیوار کے ساتھ بلند رکھنا اس کیفیت میں عارضی آرام، تھکن میں کمی اور ذہنی سکون کے لیے معاون ثابت ہوسکتا ہے۔
طبی ماہرین کے مطابق اس ورزش کو یوگا میں ’ویپریتا کرانی‘ کہا جاتا ہے۔ اس پوزیشن میں ٹانگیں جسم کے اوپری حصے سے بلند ہونے کے باعث خون اور جسمانی رطوبتوں کی گردش بہتر بنانے میں مدد مل سکتی ہے۔
ماہرین کا کہنا ہے کہ جو افراد طویل وقت تک بیٹھے یا کھڑے رہتے ہیں، دفتری کام کرتے ہیں یا مسلسل سفر کرتے ہیں، ان کے لیے یہ ورزش خاص طور پر مفید ہوسکتی ہے۔
ماہرین برائے اسپورٹس میڈیسن اور بحالیِ صحت کے مطابق زیادہ دیر بیٹھنے یا کھڑے رہنے کے علاوہ گرم موسم، نمک کا زیادہ استعمال، حمل، طویل سفر اور خون کی کمزور گردش بھی پاؤں اور ٹخنوں میں سوجن کا باعث بن سکتی ہے۔
اس ورزش کے لیے دیوار کے قریب کمر کے بل لیٹ کر ٹانگوں کو دیوار کے ساتھ سیدھا اوپر اٹھایا جاتا ہے۔ سر، کندھے اور کمر زمین پر رکھے جائیں جبکہ بازو جسم کے اطراف میں ڈھیلے چھوڑ دیے جائیں۔
ماہرین کے مطابق گہری اور پرسکون سانسیں لیتے ہوئے 5 سے 10 منٹ تک اسی پوزیشن میں رہنا کافی ہے۔
ماہرین کے مطابق اس پوزیشن سے پاؤں اور ٹخنوں کی سوجن اور بھاری پن میں کمی، تھکے ہوئے پیروں کو آرام، خون کی گردش میں بہتری اور ذہنی تناؤ میں کمی میں مدد مل سکتی ہے۔ بعض افراد کو اس کے نتیجے میں بہتر نیند اور مجموعی جسمانی سکون بھی محسوس ہوسکتا ہے، جبکہ طویل سفر کے بعد ٹانگوں کی تھکن کم کرنے میں بھی یہ ورزش معاون ثابت ہوسکتی ہے۔
دفاتر میں طویل وقت بیٹھنے والے افراد، اساتذہ، طبی عملہ، زیادہ سفر کرنے والے افراد، ورزش کرنے والے اور عمر رسیدہ افراد اپنی روزمرہ روٹین میں اس سادہ ورزش کو شامل کرسکتے ہیں۔
تاہم شدید یا بے قابو بلند فشارِ خون، آنکھوں کے بعض امراض، گردن یا کولہے کی سرجری، سنگین قلبی یا دورانِ خون کی بیماریوں میں مبتلا افراد کو یہ ورزش شروع کرنے سے پہلے ڈاکٹر سے مشورہ کرنا چاہیے۔
اگر پاؤں میں اچانک سوجن ظاہر ہو، صرف ایک ٹانگ سوج جائے، سوجن کے ساتھ درد، سرخی یا غیر معمولی گرمی محسوس ہو تو اسے معمولی مسئلہ سمجھ کر نظر انداز نہیں کرنا چاہیے۔ اسی طرح سانس لینے میں دشواری یا سینے میں درد کی صورت میں فوری طبی امداد حاصل کرنا ضروری ہے۔
ماہرین کے مطابق ٹانگیں دیوار پر رکھنے کی یہ ورزش روزمرہ آرام اور جسمانی سکون کے لیے معاون ہوسکتی ہے، تاہم مسلسل یا غیر معمولی سوجن کسی طبی مسئلے کی علامت بھی ہوسکتی ہے، اس لیے ایسی صورت میں یہ ورزش طبی علاج کا متبادل نہیں۔
