جاپان کی چھوٹی گاڑیوں کی مقبول مارکیٹ میں قدم مضبوط کرنے کے لیے چینی الیکٹرک کار ساز کمپنی بی وائی ڈی نے اپنی حکمت عملی تبدیل کرتے ہوئے مقامی صارفین کی ضروریات کے مطابق نئی الیکٹرک ’کی کار‘ متعارف کرا دی ہے۔
جاپان میں کئی برس سے کاروباری کامیابی حاصل کرنے کی کوشش کرنے والی بی وائی ڈی کے لیے جاپانی مارکیٹ اب بھی ایک بڑا چیلنج ہے۔ تاہم کمپنی کو امید ہے کہ اس کی نئی چھوٹی برقی گاڑی ’ریکو‘ جاپانی صارفین کو اپنی جانب متوجہ کرنے میں کامیاب ہوگی۔
جولائی میں متعارف کرائی گئی ’ریکو‘ کا نام جاپانی زبان میں سمندری جانور ’اوٹر‘ کے لیے استعمال ہونے والے لفظ سے لیا گیا ہے۔ یہ گاڑی جاپان کی مقبول ’کی جیدوشا‘ یعنی لائٹ کار کے معیار کو مدنظر رکھتے ہوئے تیار کی گئی ہے۔
’کی کار‘ جاپان کی آٹو مارکیٹ کا منفرد حصہ ہے۔ ان گاڑیوں کی لمبائی زیادہ سے زیادہ 3.4 میٹر اور چوڑائی 1.48 میٹر تک ہوتی ہے، جبکہ ان کے لیے ٹیکس اور انشورنس کے الگ قواعد بھی نافذ ہیں۔ چھوٹا حجم، کم خرچ اور شہری علاقوں میں آسان استعمال ان گاڑیوں کو جاپانی صارفین میں مقبول بناتا ہے۔
بی وائی ڈی کی نئی گاڑی کی ابتدائی قیمت 21 لاکھ 45 ہزار ین، یعنی تقریباً 13 ہزار امریکی ڈالر مقرر کی گئی ہے۔ کمپنی کا کہنا ہے کہ اس قیمت پر صارفین کو مناسب فیچرز اور بہتر ڈرائیونگ رینج فراہم کی جائے گی۔
جاپان کی مقامی کمپنی نسان کی ’ساکورا‘ الیکٹرک منی کار اس شعبے میں پہلے ہی مقبول ہے۔ تاہم بی وائی ڈی کا دعویٰ ہے کہ ’ریکو‘ زیادہ فیچرز اور مکمل چارج پر بہتر رینج فراہم کرتی ہے، جس سے اسے مقامی حریف کے مقابلے میں مسابقتی برتری مل سکتی ہے۔
ماہرین کے مطابق جاپانی صارفین کی مقامی برانڈز سے مضبوط وابستگی کے باعث بی وائی ڈی کے لیے یہ مارکیٹ آسان نہیں ہوگی، تاہم ’کی کار‘ کے ذریعے چینی کمپنی نے پہلی مرتبہ جاپانی صارفین کی روزمرہ ضرورت کے عین مطابق گاڑی پیش کرنے کی کوشش کی ہے۔
