شام نے پاکستان، ترکیہ اور سعودی عرب کے درمیان قائم مکہ دفاعی اتحاد میں شمولیت کے امکان پر غور شروع کردیا ہے۔ شامی وزیر خارجہ اسعد الشیبانی نے تصدیق کی ہے کہ اس حوالے سے بات چیت جاری ہے۔
بحرین میں منعقدہ منامہ ڈائیلاگ کانفرنس سے خطاب کرتے ہوئے اسعد الشیبانی نے کہا کہ مکہ دفاعی اتحاد میں شام کی شمولیت کا جائزہ لینے کے لیے مشاورت کی جارہی ہے۔
واضح رہے کہ پاکستان، سعودی عرب اور ترکیہ نے رواں سال اگست میں مکہ مکرمہ میں دفاعی معاہدے پر دستخط کیے تھے۔ معاہدے کے تحت کسی ایک ملک پر حملے کو تینوں ممالک پر حملہ تصور کیا جائے گا۔
دوسری جانب سعودی عرب حوثی حملوں میں اضافے کے تناظر میں علاقائی حمایت حاصل کرنے کی کوششیں کررہا ہے۔ رپورٹ کے مطابق رواں ماہ ریاض کے بین الاقوامی ہوائی اڈے کو ایک بڑے حملے کے بعد دو ہفتوں کے لیے بند کرنا پڑا تھا۔
اس سے قبل فرانسیسی صدر ایمانوئل میکرون نے ریاض کے دورے کے دوران کہا تھا کہ فرانس نے حوثی حملوں سے سعودی عرب کے ایک اہم تیل ٹرمینل کے تحفظ میں مدد کے لیے فوجی اہلکار بھیجے ہیں۔ اکتوبر میں برطانوی حکومت نے بھی سعودی عرب کی مدد کے لیے جنگی طیارے تعینات کرنے کا اعلان کیا تھا۔
