جماعت اسلامی اور حکومت کے درمیان مذاکرات کا پانچواں دور ختم ہوگیا، حکومتی وفد نے سیکیورٹی تھریٹ کے باعث جماعت اسلامی سے لانگ مارچ ملتوی کرنے کی درخواست کردی، تاہم جماعت اسلامی نے واضح کیا ہے کہ لیوی کے خاتمے تک لانگ مارچ لازم ہوگا۔
مذاکرات میں حکومتی وفد کی نمائندگی وفاقی وزیر احسن اقبال، رانا ثنااللہ اور صوبائی وزیر خواجہ سلمان رفیق نے کی۔
جماعت اسلامی کی جانب سے نائب امیر لیاقت بلوچ، قائم مقام سیکریٹری جنرل نذیر احمد جنجوعہ، معاون خصوصی عمیر ادریس، امیر جماعت اسلامی لاہور ضیاالدین انصاری، سیکریٹری اطلاعات شکیل احمد ترابی اور سلمان شیخ شریک ہوئے۔
مذاکرات کے دوران حکومتی وفد نے سیکیورٹی تھریٹ کا حوالہ دیتے ہوئے جماعت اسلامی سے لانگ مارچ ملتوی کرنے کی درخواست کی، جبکہ حکومتی وفد کی جانب سے جلد عوامی سطح پر غیر معمولی ریلیف دینے کی یقین دہانی بھی کرائی گئی۔
حکومتی وفد نے مذاکرات میں کہا کہ آئی ایم ایف کا دباؤ ہے اور جلد آئی ایم ایف کا وفد بھی پاکستان آنے کی توقع ہے۔
نائب امیر جماعت اسلامی لیاقت بلوچ نے کہا کہ لیوی کے خاتمے تک لانگ مارچ لازم ہوگا۔ حکومت عوامی مطالبے پر عملی اقدام کرے، وگرنہ احتجاج اور لانگ مارچ ضرور کیا جائے گا۔
لیاقت بلوچ نے کہا کہ پروگرام کے مطابق امیر جماعت اسلامی کی قیادت میں سپر لانگ مارچ کل کراچی سے شروع ہوگا۔
