تازہ ترین

کراچی میں جے یو آئی سندھ کا احتجاج، مولانا فضل الرحمٰن کے خلاف کردار کشی کی مہم بند کرنے کا مطالبہ

0

کراچی: جمعیت علماء اسلام سندھ نے مولانا فضل الرحمٰن کے خلاف مبینہ کردار کشی کی مہم، ان کے گھر کے تقدس کی پامالی اور سندھ کی تقسیم سے متعلق کوششوں کے خلاف کراچی میں احتجاجی مظاہرہ کیا۔ مظاہرین نے مطالبہ کیا کہ سیاسی رہنماؤں کے خلاف انتقامی کارروائیاں بند کرکے قومی اور سیاسی معاملات مذاکرات کے ذریعے حل کیے جائیں۔

اتوار کو گرومندر چورنگی کے قریب جامعہ بنوری ٹاؤن کے مقام پر ہونے والے مظاہرے میں جے یو آئی کے مرکزی و صوبائی رہنماؤں اور کارکنوں کی بڑی تعداد نے شرکت کی۔ شرکاء نے اپنے قائد مولانا فضل الرحمٰن کے حق میں نعرے لگائے اور ان کے خلاف جاری مبینہ کردار کشی کی مہم پر احتجاج کیا۔

مظاہرے سے خطاب کرتے ہوئے جے یو آئی سندھ کے سیکریٹری جنرل علامہ راشد محمود سومرو نے کہا کہ مولانا فضل الرحمٰن کے خلاف کردار کشی کا سلسلہ فوری طور پر بند کیا جائے اور ان کے خلاف انتقامی کارروائیاں ختم کی جائیں۔ انہوں نے کہا کہ مولانا فضل الرحمٰن ایک قومی سیاسی رہنما ہیں اور ان کی عزت و حفاظت کا دفاع کرنا جے یو آئی اپنی ذمہ داری سمجھتی ہے۔

راشد محمود سومرو کا کہنا تھا کہ ملک کی سلامتی اور سیاسی معاملات کو تصادم کے بجائے مذاکرات کے ذریعے حل کیا جانا چاہیے۔ انہوں نے کہا کہ آج کا اجتماع قائد جمعیت مولانا فضل الرحمٰن کے ساتھ تجدیدِ وفا کے لیے منعقد کیا گیا ہے اور حالات جیسے بھی ہوں، جماعت ان کے ساتھ کھڑی رہے گی۔

انہوں نے کہا کہ جے یو آئی نے ملک کے لیے بڑی قربانیاں دی ہیں اور ہمیشہ آئین کی بالادستی کے لیے جدوجہد کی ہے۔ ان کے مطابق جماعت نے مذہبی طبقے کو بندوق کے بجائے ووٹ کی پرچی کے ذریعے اپنے حقوق کے لیے جدوجہد کا راستہ دکھایا اور انہیں پارلیمان تک پہنچایا۔

علامہ راشد محمود سومرو نے کہا کہ جے یو آئی صوبائی اور وفاقی حکومتوں میں بھی اپنا کردار ادا کرتی رہی ہے۔ انہوں نے اپنے خطاب میں دعویٰ کیا کہ مولانا فضل الرحمٰن کا نام پاناما میں نہیں آیا اور نہ ہی ان کے نام سے کوئی بے نامی اکاؤنٹ سامنے آیا ہے۔

انہوں نے مزید کہا کہ مولانا فضل الرحمٰن نے آپریشن بنیان مرصوص کی حمایت کی، ملک میں امن کے قیام کے لیے اپنے ساتھیوں کے جنازے اٹھائے اور ملکی سرحدوں کے دفاع میں افواج پاکستان کے شانہ بشانہ کارکنوں کی قربانیاں پیش کیں۔ ان کا کہنا تھا کہ جے یو آئی آج بھی ملکی سلامتی کے لیے ہر قربانی دینے کو تیار ہے۔

مظاہرے سے جے یو آئی کے صوبائی نائب امیر قاری محمد عثمان، مولانا غیاث، مولانا سمیع الحق سواتی، مفتی عبدالحق عثمانی، مولانا احسان اللہ ٹکروی، مولانا فیض الحق، مفتی محمد خالد، مولانا نور الحق، مفتی لئیق اسعدی، فاروق حسن زئی اور دیگر رہنماؤں نے بھی خطاب کیا۔

مقررین نے مولانا فضل الرحمٰن کے گھر کے تقدس کی پامالی کو ناقابل قبول قرار دیتے ہوئے ان کے خلاف کردار کشی کی مہم بند کرنے کا مطالبہ کیا۔ انہوں نے کہا کہ سندھ کی تقسیم کی کسی بھی کوشش کی مخالفت کی جائے گی اور ایسے اقدامات کو کامیاب نہیں ہونے دیا جائے گا۔

مظاہرے کے اختتام پر شرکاء نے مولانا فضل الرحمٰن کے حق میں اور ان کے خلاف مبینہ کردار کشی کی مہم کے خلاف نعرے بازی کی۔ مظاہرین نے مطالبہ کیا کہ انتقامی کارروائیوں کا سلسلہ روکا جائے اور ملک کے سیاسی و قومی معاملات کو بات چیت کے ذریعے حل کیا جائے۔

جواب چھوڑیں

آپ کا ای میل ایڈریس شائع نہیں کیا جائے گا.