پاکستان کرکٹ بورڈ (پی سی بی) نے ہیڈ کوچ مائیک ہیسن کی مشاورت سے صاحبزادہ فرحان کو قومی ٹی20 ٹیم کا مستقل کپتان بنانے پر غور شروع کردیا۔
ذرائع کے مطابق صاحبزادہ فرحان کو سلمان علی آغا کی جگہ ذمہ داری دی جاسکتی ہے، پی سی بی 2028 کے آئی سی سی ٹی20 ورلڈ کپ کو مدنظر رکھتے ہوئے قومی ٹی20 ٹیم کے لیے طویل المدتی منصوبہ بندی کر رہا ہے جس کے تحت ایسے کھلاڑیوں کا وسیع پول تیار کیا جائے گا جو مستقبل میں قومی ٹیم کا بنیادی حصہ بن سکیں۔
صاحبزادہ فرحان کو پہلے ہی جاپان میں جاری ایشین گیمز کے مینز کرکٹ مقابلوں کے لیے پاکستان کی ٹی20 ٹیم کی قیادت سونپی گئی ہے۔ ذرائع کے مطابق انہیں 9، 11 اور 13 اکتوبر کو راولپنڈی کرکٹ اسٹیڈیم میں سری لنکا کے خلاف شیڈول تین ٹی20 میچز کی ہوم سیریز میں بھی کپتان برقرار رکھنے کا امکان ہے۔
ذرائع کا کہنا ہے کہ مائیک ہیسن مختصر فارمیٹ میں فرحان کو کپتان برقرار رکھنے کے حق میں ہیں، تاہم مستقل تقرری کا حتمی فیصلہ ایشین گیمز میں ان کی بیٹنگ اور قیادت کی کارکردگی کا جائزہ لینے کے بعد کیا جائے گا۔
پاکستان کی ایشین گیمز ٹی20 مہم کا آغاز 28 ستمبر کو کوارٹر فائنل سے ہوگا جہاں فرحان کو نئی ذمہ داری میں اپنی صلاحیتیں ثابت کرنے کا موقع ملے گا۔
دوسری جانب سلمان علی آغا کی حالیہ بین الاقوامی میچز میں کارکردگی پر بھی سوالات اٹھے ہیں جس کے باعث ٹی20 کپتانی کے معاملے پر نظرثانی کیے جانے کی اطلاعات ہیں۔
