اسلام آباد: جشنِ آزادی کی خوشیوں کو یادگار بنانے کے لیے وفاقی دارالحکومت اسلام آباد میں 14 اگست کے موقع پر ایک بڑی اور رنگا رنگ تقریب کا اہتمام کیا گیا ہے، جہاں شہریوں کو لائیو میوزک، مختلف پرفارمنسز، فیملی انٹرٹینمنٹ اور شاندار آتش بازی سمیت متعدد تفریحی سرگرمیوں سے لطف اندوز ہونے کا موقع ملے گا۔
اسلام آباد ضلعی انتظامیہ کے مطابق 14 اگست کو اولڈ پریڈ گراؤنڈ، ڈی چوک میں خصوصی تقریب منعقد کی جائے گی، جس کا آغاز شام 5 بجے ہوگا۔ تقریب میں شہریوں اور خاندانوں کی بڑی تعداد کی شرکت متوقع ہے۔
ڈپٹی کمشنر اسلام آباد کے ایکس اکاؤنٹ پر جاری پیغام کے مطابق یومِ آزادی کی اس خصوصی تقریب میں شرکت کے لیے شہریوں سے کسی قسم کی فیس وصول نہیں کی جائے گی اور تمام افراد کے لیے داخلہ مفت ہوگا۔
انتظامیہ کی جانب سے شہریوں کو دعوت دی گئی ہے کہ وہ اپنے اہل خانہ اور دوستوں کے ہمراہ تقریب میں شرکت کریں اور جشنِ آزادی کی خوشیوں کو بھرپور انداز میں منائیں۔
تقریب کے دوران لائیو میوزک، مختلف ثقافتی و تفریحی پرفارمنسز اور فیملی کے لیے خصوصی سرگرمیوں کا اہتمام کیا گیا ہے، جبکہ پروگرام کے اختتام پر شاندار آتش بازی بھی تقریب کا حصہ ہوگی، جس سے جشنِ آزادی کی تقریبات میں مزید رنگ بھرنے کی توقع ہے۔
اس حوالے سے چیف کمشنر اسلام آباد کے فیس بک پیج پر بھی ’سٹی پریڈ 2026‘ کے عنوان سے تقریب کی تفصیلات شیئر کی گئی ہیں۔ جاری کردہ معلومات کے مطابق پروگرام 14 اگست کو شام 5 بجے ڈی چوک میں منعقد ہوگا۔
ضلعی انتظامیہ نے شہریوں پر زور دیا ہے کہ وہ یومِ آزادی کی مناسبت سے منعقد ہونے والی اس خصوصی تقریب میں بھرپور شرکت کریں اور اپنے خاندانوں کے ساتھ آزادی کی خوشیاں منائیں۔
یومِ آزادی کے موقع پر اسلام آباد سمیت ملک بھر میں مختلف تقریبات کا اہتمام کیا جا رہا ہے، جن میں قومی پرچم کشائی، ملی نغمے، ثقافتی پروگرام اور دیگر سرگرمیاں شامل ہیں۔
