تہران: ایران اور امریکا کے درمیان جاری کشیدگی کم کرنے اور سفارتی رابطوں کو آگے بڑھانے کی کوششوں کے سلسلے میں پاکستان کے وزیر داخلہ محسن رضا نقوی تہران پہنچ گئے ہیں، جہاں وہ ایرانی حکام سے اہم ملاقاتیں کریں گے۔
ایرانی میڈیا کے مطابق محسن نقوی کا دورہ ایسے وقت میں ہو رہا ہے جب خطے میں کشیدگی کم کرنے، جنگ بندی کے امکانات پیدا کرنے اور آبنائے ہرمز میں بحری آمدورفت بحال کرنے کے لیے سفارتی کوششیں تیز کی جا رہی ہیں۔
پاکستانی وزیر داخلہ اپنے دورے کے دوران ایرانی حکام کے ساتھ خطے میں امن و استحکام، ایران امریکا تنازع کے خاتمے، مذاکرات کی بحالی اور آبنائے ہرمز کی صورتحال سمیت مختلف اہم امور پر تبادلہ خیال کریں گے۔
وزیر دفاع خواجہ آصف نے بھی آج اپنے ایک بیان میں کہا ہے کہ امریکا اور ایران آبنائے ہرمز کے معاملے پر کسی نہ کسی سمجھوتے کے قریب پہنچ سکتے ہیں۔ یہ بیان محسن نقوی کے تہران پہنچنے کے بعد سامنے آیا ہے، جس سے ظاہر ہوتا ہے کہ اسلام آباد کو دونوں فریقوں کے درمیان سفارتی پیش رفت کے امکانات نظر آ رہے ہیں۔
تاہم، دونوں ممالک کے درمیان کسی حتمی معاہدے یا جنگ بندی کی تفصیلات تاحال سامنے نہیں آئی ہیں اور آئندہ ہونے والی سفارتی ملاقاتوں کو اس حوالے سے اہم قرار دیا جا رہا ہے۔
محسن نقوی کا دورہ اس لحاظ سے بھی اہم ہے کہ ایران اور عمان کے درمیان آبنائے ہرمز کو دوبارہ کھولنے کے معاملے پر بات چیت جاری ہے۔ رائٹرز کے مطابق ایران اور عمان نے آبنائے ہرمز سے گزرنے والے بحری جہازوں کے لیے ایک مجوزہ راستے کے جغرافیائی نقاط پر باہمی سمجھوتا کیا ہے، تاہم اس پیش رفت کو ابھی مکمل سکیورٹی معاہدہ قرار نہیں دیا جا سکتا۔
ایران اس سے قبل مؤقف اختیار کرچکا ہے کہ آبنائے ہرمز کو مکمل طور پر کھولنے کے لیے امریکا کو ایرانی شرائط پوری کرنا ہوں گی۔ ان مطالبات میں پابندیوں میں نرمی، ایرانی اثاثوں کی بحالی اور جنگ سے ہونے والے نقصانات کے ازالے سمیت دیگر امور شامل ہیں۔
پاکستان گزشتہ کئی ماہ سے امریکا اور ایران کے درمیان کشیدگی کم کرنے کے لیے سفارتی رابطہ کاری میں کردار ادا کرتا رہا ہے۔ اسلام آباد نے دونوں ممالک کے درمیان مذاکرات کی میزبانی بھی کی ہے اور خود کو ایک غیر جانب دار سہولت کار کے طور پر پیش کیا ہے۔
رائٹرز کے مطابق جولائی میں بھی پاکستان نے ایران اور امریکا کے درمیان تعطل کا شکار مذاکرات دوبارہ شروع کرانے کے لیے اپنی سفارتی کوششیں تیز کی تھیں، جبکہ چین کی جانب سے بھی فریقین کے درمیان سفارتی رابطوں کی حوصلہ افزائی کی جا رہی تھی۔
پاکستانی حکومت پہلے بھی واضح کرچکی ہے کہ خطے میں امن و استحکام کے لیے مذاکرات اور سفارت کاری کو ترجیح دی جائے گی۔ اپریل میں اسلام آباد میں ہونے والے مذاکرات میں وزیر داخلہ محسن نقوی بھی پاکستانی وفد کا حصہ تھے۔
اب محسن نقوی کے دورۂ تہران کو ایران امریکا کشیدگی کم کرنے، سفارتی رابطوں کی بحالی اور آبنائے ہرمز کے معاملے پر کسی ممکنہ پیش رفت کے حوالے سے اہم قرار دیا جا رہا ہے۔
