کوئٹہ: میٹروپولیٹن کارپوریشن کوئٹہ نے اپنے مالیاتی امور کو ڈیجیٹل نظام پر منتقل کرنے اور بلدیاتی محصولات کی وصولی خودکار بنانے کے لیے نیشنل بینک آف پاکستان کے ساتھ مفاہمتی یادداشت پر دستخط کردیے۔
معاہدے پر میٹروپولیٹن کارپوریشن کے ایڈمنسٹریٹر بشیر احمد بڑیچ نے دستخط کیے۔ اس اقدام کا مقصد ادارے کے مالیاتی نظام کو جدید تقاضوں سے ہم آہنگ کرنا اور دستی طریقہ کار پر انحصار کم کرنا ہے۔
معاہدے کے تحت بلدیاتی محصولات کی ڈیجیٹل وصولی، آن لائن ادائیگیوں اور جدید بینکاری سہولتوں کا نظام متعارف کرایا جائے گا۔ اس سے مالی لین دین کا ریکارڈ بہتر بنانے اور آمدن کے مختلف ذرائع کی تفصیلات منظم انداز میں مرتب کرنے میں بھی مدد ملے گی۔
ڈیجیٹل نظام کے نفاذ سے مالی معاملات میں شفافیت، جوابدہی اور نگرانی بہتر ہونے کی توقع ہے، جبکہ محصولات کے مؤثر انتظام اور بینک ریکارڈ کی مطابقت میں بھی بہتری آئے گی۔
یہ اقدام میٹروپولیٹن کارپوریشن کوئٹہ کے انتظامی اور مالیاتی امور کو جدید خطوط پر استوار کرنے کی جانب اہم پیش رفت ہے، جس سے ادارے کی کارکردگی اور عوامی خدمات کی فراہمی کو مؤثر بنانے میں مدد مل سکتی ہے۔
