اسلام آباد: میر رضا قتل کیس کی تحقیقات میں سامنے آنے والی نئی پیش رفت نے کئی سوالات کھڑے کردیئے، وفاقی وزیر دفاع خواجہ آصف نے سندھ حکومت کی تفتیشی عمل پر تنقید کرتے ہوئے کہا ہے کہ حالیہ واقعات سے ظاہر ہوتا ہے کہ پورا نظام سمجھوتے کا شکار رہا۔
خواجہ آصف نے سوشل میڈیا پر ایک پروگرام کی ویڈیو شیئر کرتے ہوئے کہا کہ عوام کی جانب سے کیس پر مسلسل توجہ کے باعث اہم حقائق سامنے آ رہے ہیں۔ ان کا کہنا تھا کہ تحقیقات کے دوران حکام کو انتہائی محتاط رہنے کی ضرورت ہے تاکہ ماضی میں ہونے والی مبینہ کوتاہی یا سمجھوتے دوبارہ نہ دہرائے جائیں۔
انہوں نے کہا کہ میر رضا کیس نے نظام میں موجود سنگین کمزوریوں کو بھی نمایاں کیا ہے۔ جو افراد حقائق چھپانے کی کوشش کرتے رہے، انہیں بھی سامنے لانا ضروری ہے، جبکہ تحقیقات کو کسی دباؤ یا مداخلت کے بغیر آگے بڑھایا جانا چاہیے۔
دوسری جانب سندھ حکومت نے میر رضا کے قتل کی تحقیقات کے لیے عدالتی کمیشن قائم کرنے کا فیصلہ کیا ہے۔ سندھ کے وزیر داخلہ ضیا لنجار کے مطابق حکومت مقتول کے اہلخانہ کو انصاف کی فراہمی یقینی بنانا چاہتی ہے، جبکہ تحقیقات کے لیے نئی کمیٹی بھی تشکیل دے دی گئی ہے۔
حکام کے مطابق مختلف رپورٹس میں اختلاف کی صورت میں حتمی فیصلہ عدالتی کمیشن یا عدالت کرے گی۔ یہ فیصلہ ابتدائی تحقیقات پر بڑھتے ہوئے سوالات اور تحفظات کے بعد سامنے آیا ہے۔
میر رضا کی لاش کراچی سے ملنے کے بعد کیس متنازع ہوگیا تھا۔ ابتدائی تحقیقات میں موت کی ایک ممکنہ وجہ خودکشی بھی قرار دی گئی، تاہم بعد میں ہونے والے نئے پوسٹ مارٹم میں خودکشی کے امکان کو مسترد کیا گیا۔
نئے طبی معائنے کے مطابق میر رضا کو پشت پر گولی ماری گئی تھی جبکہ جسم پر تشدد کے آثار بھی پائے گئے۔ ان نتائج کے بعد حکام پر شفاف اور غیر جانبدارانہ تحقیقات کے لیے دباؤ مزید بڑھ گیا۔
اب عدالتی کمیشن کے سامنے میر رضا کی موت کے اصل حالات، ابتدائی تحقیقات میں ممکنہ کوتاہیوں اور شواہد سے متعلق تمام پہلوؤں کا جائزہ اہم ہوگا۔ خواجہ آصف نے بھی مسلسل نگرانی کی ضرورت پر زور دیتے ہوئے کہا ہے کہ تحقیقات میں کسی بھی قسم کی مداخلت یا حقائق چھپانے کی کوشش نہیں ہونی چاہیے۔
