بھارت میں انتخابی فہرستوں سے متعلق مبینہ بے ضابطگیوں کے خلاف احتجاج کے دوران بالی ووڈ اداکار عمران خان کو ممبئی میں پولیس نے حراست میں لے لیا۔ اداکار نے پولیس وین کے اندر سے اپنی سیلفی سوشل میڈیا پر شیئر کرتے ہوئے طنزیہ انداز میں لکھا، ’’میں ڈرائیو پر جارہا ہوں‘‘۔
43 سالہ اداکار کو 10 اکتوبر کو کرانتی میدان سے حراست میں لیا گیا، جہاں کاکروچ جنتا پارٹی (سی جے پی) احتجاج کررہی تھی۔
عمران خان ماضی میں بھی مختلف سیاسی اور سماجی معاملات پر اپنے خیالات کا اظہار کرتے رہے ہیں۔ وہ فن، سیاست اور طلبہ پر پولیس تشدد جیسے موضوعات پر کھل کر بات کرچکے ہیں۔
ممبئی پولیس حکام کے مطابق مظاہرے کے لیے باضابطہ اجازت حاصل نہیں کی گئی تھی۔ حکام کا کہنا تھا کہ ہائی کورٹ کے احکامات کے تحت شہر میں احتجاج کے لیے آزاد میدان مقرر ہے۔ دوسری جانب سی جے پی کے کارکنوں نے مؤقف اختیار کیا کہ انہوں نے ای میل کے ذریعے اجازت طلب کی تھی، تاہم پولیس کی جانب سے کوئی جواب موصول نہیں ہوا۔
اسی احتجاجی مہم کے سلسلے میں نئی دہلی میں بھی مظاہرہ کیا گیا، جہاں سابق وزیراعلیٰ اروند کیجریوال، مغربی بنگال کی وزیراعلیٰ ممتا بینرجی سمیت تقریباً 1,500 افراد کو حراست میں لیے جانے کی اطلاعات ہیں۔
سی جے پی انتخابی فہرستوں میں مبینہ بے ضابطگیوں کے خلاف احتجاج کرتے ہوئے چیف الیکشن کمشنر سے استعفے کا مطالبہ کررہی ہے۔ بھارتی میڈیا رپورٹس میں الیکشن کمیشن کے اندر انتخابی فہرستوں کے معاملے پر اختلافات کا بھی ذکر کیا گیا ہے۔ ان اطلاعات کے مطابق گزشتہ 10 ماہ کے دوران دیگر حکام نے چیف الیکشن کمشنر کے 14 فیصلوں پر اعتراضات اٹھائے۔
احتجاج، پولیس کارروائی اور انتخابی فہرستوں سے متعلق الزامات کے باعث یہ معاملہ بھارتی سیاسی اور سماجی حلقوں میں زیرِ بحث ہے۔
