خیبر پختونخوا میں دہشت گردی کے خلاف کارروائیوں کے دوران سی ٹی ڈی اور سیکیورٹی فورسز نے لاکی مروت کے ایف آر علاقے میں مشترکہ انٹیلی جنس بیسڈ آپریشن کرتے ہوئے دہشت گرد کمانڈر زاہد گل کو ہلاک کرنے کا دعویٰ کیا ہے۔ سی ٹی ڈی کے مطابق زاہد گل کوہاٹ پولیس لائنز پر خودکش حملے کا مبینہ ماسٹر مائنڈ تھا اور متعدد سنگین دہشت گرد واقعات میں سیکیورٹی اداروں کو مطلوب تھا۔
سی ٹی ڈی کے ترجمان کے مطابق ہلاک ہونے والا دہشت گرد خوارج گل بہادر گروپ سے وابستہ تھا۔ ترجمان نے دعویٰ کیا کہ زاہد گل نے کوہاٹ پولیس لائنز پر حملے کے دوران بارودی مواد سے بھری خودکش گاڑی کی رہنمائی کی تھی اور متعدد خودکش حملہ آوروں کو کوہاٹ پہنچانے میں بھی ملوث تھا۔
سی ٹی ڈی کے مطابق زاہد گل بلی ٹنگ میں بینک ڈکیتی کے واقعے میں بھی موجود تھا، جہاں سے 6 کروڑ روپے لوٹے گئے تھے۔ حکام کا کہنا ہے کہ لوٹی گئی رقم بنوں میں سرگرم دہشت گرد گروہوں، بشمول بکا خیل اور جانی خیل کے علاقوں میں موجود گروہوں، میں تقسیم کی گئی تھی۔
ترجمان نے مزید بتایا کہ تقریباً دو ماہ قبل زاہد گل نے کوہاٹ کی نئی پولیس لائنز پر حملے کے لیے ایک خودکش حملہ آور کو بھی پہنچایا تھا، تاہم یہ کوشش ناکام بنا دی گئی۔ سی ٹی ڈی کے مطابق اس کے آئندہ ممکنہ اہداف میں کوہاٹ کا پولیس ٹریننگ اسکول بھی شامل تھا۔
دوسری جانب پشاور کے علاقے حسن خیل میں گزشتہ رات سپینہ میلہ پولیس چیک پوسٹ پر دہشت گردوں کے حملے میں ایک پولیس کانسٹیبل شہید ہوگیا۔ کیپیٹل سٹی پولیس آفیسر میاں سعید احمد نے جمعے کو بتایا کہ ڈیوٹی پر موجود اہلکاروں نے حملہ آوروں کا بھرپور مقابلہ کیا اور جوابی فائرنگ کے نتیجے میں انہیں پسپا ہو کر فرار ہونے پر مجبور کر دیا۔
سی سی پی او کے مطابق فائرنگ کے تبادلے میں متعدد دہشت گردوں کے زخمی ہونے کی اطلاعات کی تصدیق کی جا رہی ہے۔ فرار ہونے والے حملہ آوروں کی تلاش کے لیے علاقے میں سرچ آپریشن بھی شروع کر دیا گیا ہے۔
ادھر پشاور کے گنجان آباد علاقے یکہ توت میں پولیس نے بروقت کارروائی کرتے ہوئے 11 کلوگرام وزنی پریشر ککر بم ناکارہ بنا کر دہشت گردی کی ممکنہ کوشش ناکام بنا دی۔ مشتبہ دھماکا خیز مواد کی موجودگی کی اطلاع ملنے پر بم ڈسپوزل اسکواڈ نے کارروائی کی اور بم کو محفوظ طریقے سے ناکارہ بنا دیا۔
آپریشن کی نگرانی ایس پی سٹی شاہد عدنان اور یکہ توت تھانے کے ایس ایچ او ریاض آفریدی نے کی۔ پولیس کے مطابق بروقت کارروائی سے گنجان آباد علاقے کے رہائشیوں کو ممکنہ خطرے سے محفوظ رکھنے میں مدد ملی۔
