ضلع واشک میں سیکیورٹی فورسز کی کارروائی کے دوران پانچ دہشت گردوں کی ہلاکت پر وزیراعلیٰ بلوچستان میر سرفراز بگٹی نے اطمینان کا اظہار کرتے ہوئے کہا ہے کہ صوبے میں امن و استحکام کو نقصان پہنچانے کی کوششیں کامیاب نہیں ہونے دی جائیں گی۔
وزیراعلیٰ نے کہا کہ بروقت اور مؤثر کارروائی دہشت گردی کے خلاف جاری کوششوں میں اہم پیش رفت ہے۔ ان کے مطابق کارروائی کے دوران دہشت گردوں کے ٹھکانے کو تباہ کرنے کے ساتھ اسلحہ اور دھماکہ خیز مواد برآمد کیے جانے کی اطلاعات بھی سامنے آئی ہیں۔
میر سرفراز بگٹی نے کہا کہ بلوچستان میں امن و استحکام کو نقصان پہنچانے والے عناصر اپنے مقاصد حاصل نہیں کر سکیں گے۔ انہوں نے سیکیورٹی فورسز اور قانون نافذ کرنے والے اداروں کی کوششوں کو سراہتے ہوئے کہا کہ دہشت گردی کے خاتمے کے لیے ان کا کردار اہم ہے۔
وزیراعلیٰ بلوچستان نے واضح کیا کہ دہشت گردوں اور ان کے سہولت کاروں کے خلاف کارروائیاں جاری رہیں گی، جبکہ صوبے میں پائیدار امن کے قیام کے لیے تمام متعلقہ ادارے اپنی ذمہ داریاں ادا کرتے رہیں گے۔
