اسلام آباد: سعودی عرب کی سلامتی اور حرمین شریفین کے تحفظ کے حوالے سے پاکستان نے ایک بار پھر اپنے غیر مشروط عزم کا اظہار کردیا۔ ڈی جی آئی ایس پی آر لیفٹیننٹ جنرل احمد شریف چوہدری نے واضح کیا ہے کہ پاکستان سعودی عرب کے دفاع کے لیے کسی بھی حد تک جانے کو تیار ہے اور مکہ مکرمہ و مدینہ منورہ کے تحفظ کے عزم میں کوئی ابہام نہیں۔
لیفٹیننٹ جنرل احمد شریف چوہدری نے کہا کہ پاکستان سعودی عرب کے ساتھ سفارتی اور عملی، دونوں سطحوں پر مکمل طور پر کھڑا ہے۔ ان کے مطابق سعودی عرب کی سلامتی کے لیے پاکستان کا عزم غیر مشروط ہے اور کسی بھی جارحیت کی صورت میں ملک اپنے وعدوں پر قائم رہے گا۔
ڈی جی آئی ایس پی آر نے بتایا کہ پاکستان کی سیاسی اور عسکری قیادت سعودی قیادت کے ساتھ مسلسل رابطے میں ہے۔ ان کا کہنا تھا کہ پاکستان سعودی عرب کی سلامتی کے لیے کیے گئے وعدوں کو پورا کر رہا ہے اور ضرورت کے مطابق سعودی عرب کی درخواست پر ہر ممکن اقدام کیا جائے گا۔
انہوں نے واضح کیا کہ پاکستان کی حمایت صرف سفارتی سطح تک محدود نہیں بلکہ عملی تعاون بھی اس عزم کا حصہ ہے۔ ان کے مطابق پاکستان سعودی عرب اور اسلام کے مقدس ترین مقامات مکہ مکرمہ اور مدینہ منورہ کے تحفظ کے لیے اپنے عزم پر قائم ہے۔
یہ بیان ایسے وقت میں سامنے آیا ہے جب سعودی عرب کو حوثی حملوں کے باعث سکیورٹی چیلنجز کا سامنا ہے۔ حالیہ دنوں میں سعودی علاقوں پر میزائل اور ڈرون حملوں کے واقعات رپورٹ ہوئے ہیں، جبکہ مکہ مکرمہ کے قریب ایک حوثی ڈرون کو روکنے کی اطلاع بھی سامنے آئی۔
لیفٹیننٹ جنرل احمد شریف چوہدری نے مزید کہا کہ پاکستان موجودہ علاقائی بحران کے حل کے لیے خطے کے دیگر ممالک اور شراکت داروں کے ساتھ بھی رابطے میں ہے اور ایک مذاکراتی و پرامن حل کے لیے سفارتی کوششیں جاری ہیں۔ انہوں نے کہا کہ پاکستان مکہ جوائنٹ ڈیفنس ایگریمنٹ سمیت اپنے دفاعی وعدوں پر عملدرآمد کر رہا ہے۔
