لاہور: پاکستان کی آٹو صنعت میں مقامی پیداوار، سرمایہ کاری اور برآمدات کے فروغ کے لیے حکومت نے نئی پالیسی متعارف کرانے کا اعلان کردیا۔ وزیراعظم کے مشیر برائے صنعت و پیداوار ہارون اختر خان نے کہا ہے کہ حکومت جلد نئی آٹو پالیسی پیش کرے گی، جس میں آٹو پارٹس بنانے والوں سمیت شعبے سے وابستہ تمام متعلقہ فریقوں کے لیے مراعات شامل ہوں گی۔
لاہور میں پاکستان انٹرنیشنل آٹو شو 2026 کے افتتاح کے موقع پر گفتگو کرتے ہوئے ہارون اختر خان نے کہا کہ حکومت وزیراعظم شہباز شریف کے وژن کے تحت آٹو پارٹس کی برآمدات بڑھانے اور پاکستانی صنعت کو عالمی منڈیوں تک رسائی دلانے کے لیے اقدامات کررہی ہے۔
انہوں نے کہا کہ پاکستان کی آٹوموٹیو صنعت میں ترقی اور برآمدات کے وسیع امکانات موجود ہیں، جبکہ آٹو شو مقامی مینوفیکچرنگ، جدید ٹیکنالوجی، سرمایہ کاری اور کاروباری روابط کے فروغ کے لیے اہم پلیٹ فارم ہے۔
تین روزہ پاکستان انٹرنیشنل آٹو شو 2026 لاہور ایکسپو سینٹر میں جاری ہے، جس میں ملکی و غیر ملکی صنعت کار، کاروباری شخصیات اور مندوبین شریک ہیں۔ چھوٹے اور درمیانے درجے کے کاروباری اداروں کی ترقی کے ادارے نے پاکستان ایسوسی ایشن آف آٹوموٹیو پارٹس اینڈ ایکسیسریز مینوفیکچررز کے اشتراک سے نمائش میں اسٹریٹجک شراکت دار کے طور پر شرکت کی ہے۔
ہارون اختر خان نے متعلقہ ادارے کو ہدایت کی کہ آٹو پارٹس کے شعبے سے وابستہ چھوٹے اور درمیانے درجے کے کاروباری اداروں کو بھرپور معاونت فراہم کی جائے تاکہ وہ ملکی اور عالمی منڈیوں تک رسائی حاصل کرسکیں۔
اس موقع پر متعلقہ ادارے کی چیف ایگزیکٹو افسر نادیہ جہانگیر سیٹھ نے کہا کہ آٹوموٹیو شعبہ چھوٹے اور درمیانے درجے کے کاروباری اداروں کی قیادت میں صنعتی ترقی کی بڑی صلاحیت رکھتا ہے۔ ان کے مطابق ادارہ جدید ٹیکنالوجی، کاروباری شراکت داری اور ملکی و عالمی مارکیٹوں تک رسائی کے مواقع فراہم کرنے کے لیے صنعت کے نمائندہ اداروں کے ساتھ کام کررہا ہے۔
پاکستان انٹرنیشنل آٹو شو 2026 کے منتظمین نے بھی اس شراکت داری کا خیرمقدم کرتے ہوئے کہا کہ اس سے چھوٹے اور درمیانے درجے کے کاروباری اداروں کی شرکت اور مقامی مینوفیکچرنگ کے فروغ کی کوششوں کو تقویت ملے گی۔
