کوئٹہ: بلوچستان میں دہشت گردی کے خلاف سیکیورٹی فورسز کی کارروائیوں میں مزید 16 دہشت گرد مارے گئے، جس کے بعد 21 ستمبر سے مختلف کارروائیوں میں ہلاک ہونے والے دہشت گردوں کی تعداد 33 ہوگئی ہے۔
پاک فوج کے شعبہ تعلقات عامہ (ISPR) کے مطابق سیکیورٹی فورسز نے 24 ستمبر کو بلوچستان میں مزید دہشت گردوں کے ٹھکانوں کو نشانہ بنایا، جہاں فائرنگ کے تبادلے میں 5 دہشت گرد مارے گئے۔ کارروائی کے دوران ہتھیار، گولہ بارود اور دھماکا خیز مواد بھی برآمد کیا گیا۔
ISPR کے مطابق شعبان میں جاری آپریشن کے دوران اب تک 22 دہشت گرد مارے جا چکے ہیں، جبکہ علاقے میں کلیئرنس آپریشن خطرہ مکمل طور پر ختم ہونے تک جاری رہے گا۔
دوسری جانب 25 ستمبر کو ضلع نوشکی میں خفیہ اطلاعات کی بنیاد پر ایک اور کارروائی کی گئی، جہاں سیکیورٹی فورسز نے دہشت گردوں کے ٹھکانے پر کارروائی کی۔ شدید فائرنگ کے تبادلے کے بعد 11 دہشت گرد مارے گئے۔
ISPR کے مطابق ملک میں انسدادِ دہشت گردی کی کارروائیاں عزمِ استحکام کے تحت جاری رہیں گی، جس کا مقصد غیر ملکی معاونت یافتہ دہشت گردی کے خطرے کا خاتمہ ہے۔
صدر مملکت آصف علی زرداری نے بلوچستان میں سیکیورٹی فورسز کی کارروائیوں کو سراہتے ہوئے اہلکاروں کو خراجِ تحسین پیش کیا۔ انہوں نے 33 دہشت گردوں کی ہلاکت اور کارروائیوں کے دوران ہتھیار و گولہ بارود کی برآمدگی کو اہم پیش رفت قرار دیا۔
صدر زرداری نے کہا کہ پاکستان کو غیر مستحکم کرنے کی کوششوں کو ناکام بنایا جائے گا۔
بلوچستان میں حالیہ ہفتوں کے دوران دہشت گردی کے واقعات میں اضافے کے بعد سیکیورٹی اداروں نے صوبے کے مختلف علاقوں میں انسدادِ دہشت گردی کارروائیاں تیز کر دی ہیں۔
