اسلام آباد-مکہ دفاعی اتحاد کے تحت پاکستان، سعودی عرب اور ترکیہ کے درمیان تعاون کو مزید آگے بڑھانے کیلئے اہم سفارتی رابطے ہوئے ہیں۔ نائب وزیراعظم اور وزیر خارجہ اسحاق ڈار نے سعودی وزیر خارجہ شہزادہ فیصل بن فرحان اور ترک وزیر خارجہ حاکان فیدان سے الگ الگ ٹیلیفونک گفتگو کی، جس میں دفاعی تعاون، علاقائی صورتحال اور حالیہ اجلاس میں طے پانے والی مفاہمت پر پیش رفت کا جائزہ لیا گیا۔
دفتر خارجہ کے مطابق اسحاق ڈار نے سعودی وزیر خارجہ شہزادہ فیصل بن فرحان سے گفتگو کے دوران علاقائی اور بین الاقوامی صورتحال پر تبادلہ خیال کیا۔ دونوں رہنماؤں نے باہمی دلچسپی کے امور پر بھی خیالات کا تبادلہ کیا، جبکہ مختلف کثیرالجہتی فورمز پر تعاون کے حوالے سے بھی بات چیت ہوئی۔
مکہ مشترکہ دفاعی معاہدے پر پیش رفت کا جائزہ
دونوں وزرائے خارجہ نے مکہ مشترکہ دفاعی معاہدے کے تحت قائم کیے گئے اسٹریٹجک سیاسی و دفاعی کمیٹی کے پہلے اجلاس میں ہونے والی پیش رفت کا جائزہ لیا۔
یہ اجلاس 31 اگست کو استنبول میں منعقد ہوا تھا، جس میں دفاعی اتحاد کے حوالے سے اہم امور پر تبادلہ خیال اور متعدد معاملات پر مفاہمت ہوئی تھی۔ اسحاق ڈار اور شہزادہ فیصل بن فرحان نے اجلاس میں طے پانے والی مفاہمت پر عملدرآمد کے حوالے سے بھی گفتگو کی۔
دونوں جانب سے اس بات پر اتفاق کیا گیا کہ باہمی دلچسپی کے معاملات پر قریبی رابطہ اور مشاورت کا سلسلہ جاری رکھا جائے گا۔
ترک وزیر خارجہ سے بھی اہم گفتگو
اسحاق ڈار نے ترک وزیر خارجہ حاکان فیدان سے بھی الگ سے ٹیلیفونک رابطہ کیا۔ نائب وزیراعظم نے استنبول میں اسٹریٹجک سیاسی و دفاعی کمیٹی کے افتتاحی اجلاس کی میزبانی پر ترک وزیر خارجہ کا شکریہ ادا کیا۔
گفتگو کے دوران دونوں ممالک نے اجلاس کے نتائج کا جائزہ لیا اور مکہ دفاعی اتحاد کے تحت تعاون کو مزید مضبوط بنانے کیلئے آئندہ کے اقدامات پر تبادلہ خیال کیا۔
پاکستان اور ترکیہ کے درمیان دفاعی و سیاسی تعاون کو مزید مؤثر بنانے اور مکہ دفاعی اتحاد کے تحت طے شدہ معاملات پر پیش رفت کیلئے رابطے جاری رکھنے پر بھی بات ہوئی۔
پاکستان اور سعودی عرب کا دفاعی معاہدہ
واضح رہے کہ پاکستان اور سعودی عرب نے 7 اگست کو دفاعی معاہدے پر دستخط کیے تھے، جبکہ ترکیہ بھی اتحاد کے فالو اَپ میکنزم کا حصہ ہے۔
مکہ دفاعی اتحاد کے تحت قائم اسٹریٹجک سیاسی و دفاعی کمیٹی کا پہلا اجلاس 31 اگست کو استنبول میں ہوا، جس کے بعد پاکستان نے سعودی عرب اور ترکیہ کے ساتھ دفاعی و سیاسی تعاون کو مزید آگے بڑھانے کیلئے سفارتی رابطوں کا سلسلہ جاری رکھا ہے۔
