انسان کی عمر جیسے جیسے بڑھتی ہے، سالوں کا ہندسہ تو تبدیل ہوتا رہتا ہے لیکن خود کو بوڑھا تسلیم کرنا ایک الگ احساس ہے۔ اسی سوال نے عمر رسیدگی، سوچ اور فعال زندگی سے متعلق ایک دلچسپ بحث کو جنم دیا ہے۔
تحریر میں چرچ میں سینئر سٹیزنز اور معمر افراد کے لیے مخصوص نشستوں کا حوالہ دیتے ہوئے بتایا گیا کہ بظاہر معمولی نظر آنے والی ایسی نشستیں بعض اوقات انسان کو اپنی بڑھتی عمر کا احساس دلا دیتی ہیں۔
تحریر کے مطابق جبل علی کے ایک چرچ میں قربان گاہ کے قریب دو یا تین نشستیں سینئر سٹیزنز، بالخصوص معمر اور بیمار افراد کے لیے مخصوص ہیں۔ عام طور پر یہ نشستیں کافی دیر تک خالی رہتی ہیں، تاہم عبادت کے دوران ضرورت کے مطابق کوئی شخص ان میں بیٹھ جاتا ہے۔
مصنف اور ان کی اہلیہ بھی طویل عرصے تک ان نشستوں پر بیٹھنے سے گریز کرتے رہے کیونکہ ان کا خیال تھا کہ یہ جگہ کسی حقیقی ضرورت مند یا عمر رسیدہ شخص کے لیے مخصوص رہنی چاہیے۔
تاہم ایک روز چرچ میں جگہ کم ہونے پر دونوں نے انہی مخصوص نشستوں پر بیٹھنے کا فیصلہ کیا۔ کچھ دیر بعد ایک منتظم نے انتہائی شائستگی سے انہیں یاد دلایا کہ یہ نشستیں سینئر سٹیزنز کے لیے مختص ہیں۔
جب مصنف نے سوال کیا کہ سینئر سٹیزن سے مراد کس عمر کے افراد ہیں تو منتظم کی مسکراہٹ نے انہیں ایسا جواب دیا جس پر وہ خود بھی مسکرائے۔
تحریر میں اس نکتے پر زور دیا گیا کہ عمر بڑھنے کے ساتھ سب سے مشکل مرحلہ سالوں کا گزرنا نہیں بلکہ خود کو ’بوڑھا‘ تسلیم کرنا ہے۔ بہت سے افراد بڑھتی عمر کے باوجود کام، سفر، ڈرائیونگ، ورزش اور دیگر سرگرمیاں جاری رکھتے ہیں۔
تحریر میں عمر اور عمر رسیدگی کے فرق کو بھی واضح کیا گیا ہے۔ برتھ سرٹیفکیٹ پر درج عمر صرف یہ بتاتی ہے کہ انسان کو دنیا میں آئے کتنا عرصہ گزر چکا ہے، یہ نہیں بتاتی کہ وہ خود کو کیسا
محسوس کرتا ہے یا مستقبل میں کیا کچھ کرنا چاہتا ہے۔
شیکسپیئر کے ڈرامے “As You Like It” میں انسانی زندگی کے آخری مرحلے کو ’دوسرا بچپن‘ اور فراموشی سے تعبیر کیا گیا ہے، تاہم تحریر کے مطابق جدید دور کے فعال سینئر سٹیزنز کی زندگی اس تصور سے کہیں مختلف نظر آتی ہے۔
