افغانستان میں طالبان حکومت کے خلاف مزاحمتی سرگرمیوں میں تیزی آنے کی اطلاعات سامنے آئی ہیں، جہاں افغانستان فریڈم فرنٹ کی جانب سے ایک ماہ کے دوران مختلف علاقوں میں متعدد کارروائیوں کا دعویٰ کیا گیا ہے۔ مزاحمتی گروپ کی جانب سے جاری تفصیلات کے مطابق طالبان کے سکیورٹی اور دفاعی اہداف کو مختلف مقامات پر نشانہ بنایا گیا۔
افغانستان فریڈم فرنٹ کے مطابق 23 جولائی سے 22 اگست کے دوران طالبان کے خلاف مجموعی طور پر 21 کارروائیاں کی گئیں۔ ان کارروائیوں کا سب سے زیادہ مرکز صوبہ بدخشان رہا، جہاں زیباک اور فیض آباد کے گردونواح میں طالبان فورسز کے ساتھ متعدد جھڑپوں کی اطلاعات سامنے آئیں۔
تفصیلات کے مطابق بدخشان کے علاوہ بغلان، ننگرہار، فاریاب، نورستان اور پنجشیر میں بھی طالبان کے مختلف سکیورٹی اہداف کو نشانہ بنایا گیا۔ مزاحمتی کارروائیوں میں طالبان کے قافلوں، سکیورٹی چوکیوں، فوجی سازوسامان، ڈرونز اور دفاعی تنصیبات کو ہدف بنائے جانے کا دعویٰ کیا گیا۔
افغانستان فریڈم فرنٹ کی جانب سے یہ بھی دعویٰ کیا گیا کہ کابل اور کندوز میں موجود عسکری ہوائی اڈوں کو میزائل اور راکٹ حملوں کا نشانہ بنایا گیا۔ مختلف محاذوں پر ہونے والی جھڑپوں کے دوران طالبان فورسز کو نقصان پہنچانے اور بعض دفاعی پوزیشنوں پر قبضہ حاصل کرنے کا بھی دعویٰ کیا گیا ہے۔
مزاحمتی گروپ کے مطابق کارروائیوں کے نتیجے میں طالبان کے متعدد اہلکار ہلاک اور زخمی ہوئے، تاہم ان دعوؤں کی آزاد ذرائع سے مکمل تصدیق سامنے نہیں آئی۔ افغانستان میں طالبان مخالف مسلح گروہوں کی سرگرمیاں خطے کی سکیورٹی صورتحال کے تناظر میں مسلسل توجہ کا مرکز بنی ہوئی ہیں۔
