اسلام آباد: جمعیت علمائے اسلام (ف) کے سربراہ مولانا فضل الرحمان نے کہا ہے کہ پاکستان تحریک انصاف نے انہیں یقین دہانی کرائی تھی کہ مطالبات تسلیم ہونے کی صورت میں لانگ مارچ ختم کردیا جائے گا۔ ان کے مطابق انہوں نے حکومت اور پی ٹی آئی کے درمیان معاملہ حل کرانے کے لیے وزیراعظم شہباز شریف سے بھی رابطہ کیا۔
اتوار کو پریس کانفرنس کرتے ہوئے مولانا فضل الرحمان نے بتایا کہ انہوں نے پی ٹی آئی قیادت سے پوچھا تھا کہ آیا وہ لانگ مارچ ختم کرنے پر آمادہ ہیں یا نہیں۔ ان کے مطابق پی ٹی آئی رہنماؤں نے جواب دیا کہ مطالبات مان لیے جائیں تو وہ لانگ مارچ ختم کرنے کے لیے تیار ہیں۔
مولانا فضل الرحمان کے مطابق انہوں نے اتوار کی صبح فجر کے وقت وزیراعظم شہباز شریف سے رابطہ کیا اور صبح چھ بجے ملاقات کے لیے روانہ ہوگئے۔
انہوں نے بتایا کہ ملاقات کے دوران وزیراعظم شہباز شریف نے انہیں یقین دہانی کرائی کہ پی ٹی آئی رہنماؤں کی عمران خان سے ملاقات بھی کروائی جائے گی اور ان کا علاج بھی کروایا جائے گا۔ مولانا فضل الرحمان کے مطابق وزیراعظم نے کہا تھا کہ وفاقی کابینہ کے اجلاس میں کسی نتیجے پر پہنچنے کی کوشش کی جائے گی۔
جمعیت علمائے اسلام کے سربراہ نے بتایا کہ وزیراعظم سے ملاقات کے بعد وہ واپس آئے تو صبح ساڑھے نو بجے انہیں بتایا گیا کہ وزیراعظم سفارشات وفاقی کابینہ کے سامنے پیش کریں گے تاکہ منظوری حاصل کی جاسکے۔
تاہم مولانا فضل الرحمان کے مطابق صبح ساڑھے دس بجے نائب وزیراعظم اسحاق ڈار نے انہیں فون کرکے بتایا کہ وفاقی حکومت خیبرپختونخوا میں گورنر راج اور ایمرجنسی نافذ کررہی ہے۔
