فوجی سازوسامان کی مقامی تیاری اور دفاعی خود انحصاری کے فروغ کی جانب اہم پیش رفت سامنے آئی ہے، آرمی چیف و چیف آف ڈیفنس فورسز فیلڈ مارشل سید عاصم منیر نے واہ میں پاکستان آرڈیننس فیکٹریز کا دورہ کیا اور مقامی طور پر تیار کیے گئے ہتھیاروں و گولہ بارود کے تجربات کا مشاہدہ کیا۔
انٹر سروسز پبلک ریلیشنز (آئی ایس پی آر) کے مطابق فیلڈ مارشل سید عاصم منیر نے ہفتے کے روز پاکستان آرڈیننس فیکٹریز (پی او ایف) واہ کا دورہ کیا، جو ملک کا سب سے بڑا دفاعی صنعتی کمپلیکس ہے۔
دورے کے دوران پی او ایف کی پیداواری صلاحیت، برآمدی امکانات اور پاکستان کے دفاعی صنعتی شعبے میں ادارے کے کردار کا جائزہ لیا گیا۔
آرمی چیف کو پی او ایف کے مختلف آپریشنز اور فوجی سازوسامان کی وسیع اقسام کی مقامی سطح پر تیاری اور ترقی کے ذریعے ملکی دفاع کو مضبوط بنانے میں ادارے کے کردار پر بریفنگ دی گئی۔
فیلڈ مارشل سید عاصم منیر نے مقامی طور پر ڈیزائن اور تیار کیے گئے ہتھیاروں اور گولہ بارود کے ٹیسٹ اور ٹرائلز کا بھی مشاہدہ کیا۔
آئی ایس پی آر کے مطابق یہ تجربات پی او ایف کی جدت، خود انحصاری اور پاکستان کی مقامی دفاعی پیداواری صلاحیتوں کو مزید بہتر بنانے کی کوششوں کی عکاسی کرتے ہیں۔
آرمی چیف کو ڈیفنس انڈسٹریل پروڈکشن اینڈ ریگولیٹری اتھارٹی آف پاکستان (ڈیپرا) آرڈیننس کے نفاذ کے بعد ادارے کو کارپوریٹائز کرنے کے عمل میں ہونے والی پیش رفت سے بھی آگاہ کیا گیا۔
انہیں مقامی پیداوار بڑھانے اور جدید بنانے کے اقدامات کے بارے میں بھی بریفنگ دی گئی، جن میں دو نئے صنعتی پلانٹس کی تنصیب بھی شامل ہے۔ بتایا گیا کہ یہ پلانٹس رواں سال کے اختتام تک پیداوار شروع کرنے کی توقع ہے۔
دورے کے موقع پر دفاعی شعبے میں خود انحصاری، مقامی پیداوار اور تکنیکی جدت کو مزید مضبوط بنانے کے عزم کا اعادہ کیا گیا۔
