اسلام آباد — پاکستان میں ربیع الاول کے چاند کی رویت کا فیصلہ سامنے آگیا ہے، مرکزی رویت ہلال کمیٹی نے اعلان کیا ہے کہ ملک کے کسی حصے سے ربیع الاول کا چاند نظر آنے کی شہادت موصول نہیں ہوئی، جس کے بعد یکم ربیع الاول ہفتہ 15 اگست کو ہوگی۔
ربیع الاول کا چاند دیکھنے کے لیے مرکزی رویت ہلال کمیٹی کا اجلاس چیئرمین مولانا عبدالخبیر آزاد کی زیر صدارت اسلام آباد میں منعقد ہوا، جبکہ ملک کے مختلف علاقوں میں زونل رویت ہلال کمیٹیوں کے اجلاس بھی ہوئے۔
اجلاسوں کے دوران ملک کے مختلف علاقوں سے چاند نظر آنے کے حوالے سے موصول ہونے والی اطلاعات اور شہادتوں کا جائزہ لیا گیا۔ تاہم کسی بھی مقام سے ربیع الاول کا چاند نظر آنے کی قابل قبول شہادت موصول نہیں ہوئی۔
مرکزی رویت ہلال کمیٹی کے چیئرمین مولانا عبدالخبیر آزاد نے اجلاس کے بعد باقاعدہ اعلان کرتے ہوئے کہا کہ پاکستان میں ربیع الاول کا چاند نظر نہیں آیا، لہٰذا یکم ربیع الاول 15 اگست بروز ہفتہ ہوگی۔
انہوں نے مزید اعلان کیا کہ 12 ربیع الاول 26 اگست بروز بدھ کو ہوگی۔
ربیع الاول اسلامی سال کا تیسرا مہینہ ہے اور مسلمانوں کے لیے اس مہینے کو خصوصی اہمیت حاصل ہے۔ 12 ربیع الاول کو عید میلاد النبی ﷺ کے حوالے سے ملک بھر میں مختلف مذہبی و روحانی اجتماعات، محافلِ نعت اور دیگر پروگرام منعقد کیے جاتے ہیں۔
مرکزی رویت ہلال کمیٹی کے اعلان کے بعد ملک بھر میں ربیع الاول کی تاریخوں کا باضابطہ تعین ہوگیا ہے، جبکہ 12 ربیع الاول کے موقع پر مختلف سرکاری اور مذہبی سرگرمیوں کی تیاریاں بھی شروع کی جائیں گی۔
