تہران: ایران اور امریکا کے درمیان جاری شدید کشیدگی کے دوران ایرانی صدر مسعود پزشکیان نے عرب اور خلیجی ممالک کو اہم پیغام دیتے ہوئے کہا ہے کہ ایران اپنے ہمسایہ ممالک کے ساتھ جنگ نہیں چاہتا اور خطے کے ممالک کو اپنے مسائل خود حل کرنے چاہئیں۔
الجزیرہ کے مطابق ایرانی صدر مسعود پزشکیان نے کہا کہ ایران اپنے پڑوسی عرب ممالک کے خلاف جنگ کا خواہاں نہیں ہے۔ ان کے بیان میں بالخصوص ان عرب ممالک کا ذکر کیا گیا جہاں امریکی فوجی اڈے موجود ہیں۔
مسعود پزشکیان کا کہنا تھا کہ عرب ممالک اور ایران ایک ہی خطے کے پڑوسی ہیں، اس لیے خطے کے ممالک کو اپنے مسائل خود حل کرنے چاہئیں۔ ان کے مطابق بیرونی طاقتوں کی فوجی موجودگی خطے کے مسائل کا مستقل حل نہیں ہے۔
ایرانی صدر نے کہا کہ خطے کے ممالک کے درمیان تنازعات کا حل براہِ راست علاقائی سفارت کاری کے ذریعے ہونا چاہیے، نہ کہ بیرونی طاقتوں کی فوجی مداخلت سے۔
ایرانی صدر کا یہ بیان ایسے وقت میں سامنے آیا ہے جب امریکا اور ایران کے درمیان فوجی کشیدگی نے مشرق وسطیٰ کے کئی ممالک کو دباؤ میں ڈال دیا ہے، جبکہ خلیجی خطے میں موجود امریکی فوجی اثاثوں کا معاملہ بھی تنازع کا اہم حصہ بنا ہوا ہے۔
ایرانی مؤقف کو دو سطحوں پر اہم قرار دیا جارہا ہے۔ ایک جانب تہران عرب حکومتوں کو یہ یقین دلانے کی کوشش کررہا ہے کہ ایران انہیں اپنا براہِ راست دشمن نہیں سمجھتا، جبکہ دوسری جانب خطے میں امریکی فوجی موجودگی پر اس کا اعتراض برقرار ہے۔
دوسری جانب خلیجی ممالک میں موجود امریکی تنصیبات کو ایرانی حملوں میں ہدف بنائے جانے اور آبنائے ہرمز میں بڑھتی کشیدگی نے عرب ممالک کیلئے صورتحال کو مزید پیچیدہ کردیا ہے۔
ایسوسی ایٹڈ پریس کے مطابق ایران نے امریکی اور اسرائیلی حملوں کے جواب میں عرب ممالک میں موجود امریکی اثاثوں کو بھی اپنے اہداف میں شامل کیا ہے۔
ایران اور امریکا کے درمیان جاری جنگ و کشیدگی نے پہلے ہی خلیجی ممالک کو سفارتی اور سیکیورٹی دباؤ میں ڈال دیا ہے، جبکہ آبنائے ہرمز اور پورے خلیجی خطے کی سلامتی بھی متاثر ہوئی ہے۔
