اسلام آباد: پاکستان اور ناروے نے باہمی تعلقات کو نئی وسعت دینے اور تجارت، سرمایہ کاری سمیت مختلف شعبوں میں تعاون کو مزید فروغ دینے پر اتفاق کیا ہے۔ دونوں ممالک نے دوستانہ تعلقات کو مزید مضبوط بنانے کے عزم کا اظہار کرتے ہوئے عوامی روابط اور باہمی دلچسپی کے شعبوں میں تعاون بڑھانے پر بھی زور دیا۔
نائب وزیراعظم و وزیر خارجہ سینیٹر محمد اسحاق ڈار اور ناروے کے وزیر خارجہ اسپن بارتھ ایدے کے درمیان اسلام آباد میں وفود کی سطح پر مذاکرات ہوئے، جس میں دونوں ممالک کے درمیان دوطرفہ تعلقات کے مختلف پہلوؤں کا تفصیلی جائزہ لیا گیا۔
دفتر خارجہ کے مطابق مذاکرات کے دوران تجارت، سرمایہ کاری، موسمیاتی تبدیلی، بحری امور اور تعلیم سمیت متعدد اہم شعبوں میں تعاون کو مزید فروغ دینے کے امکانات پر تبادلہ خیال کیا گیا۔
دونوں فریقین نے پاکستان اور ناروے کے درمیان موجود دوستانہ اور خوشگوار تعلقات پر اطمینان کا اظہار کیا اور اس بات پر اتفاق کیا کہ باہمی دلچسپی کے شعبوں میں تعاون کو مزید گہرا کیا جائے گا۔
مذاکرات میں ناروے میں مقیم پاکستانی کمیونٹی کے کردار کو بھی خصوصی طور پر سراہا گیا۔ دونوں جانب سے اس بات پر اتفاق کیا گیا کہ عوامی سطح پر روابط کو مزید مضبوط بنایا جائے تاکہ دونوں ممالک کے عوام کے درمیان تعلقات میں مزید بہتری لائی جاسکے۔
ملاقات کے دوران علاقائی اور عالمی صورتحال سمیت باہمی دلچسپی کے اہم امور پر بھی تفصیلی تبادلہ خیال کیا گیا۔ فریقین نے مختلف بین الاقوامی اور علاقائی معاملات پر ایک دوسرے کے مؤقف کو سمجھنے اور باہمی رابطوں کو مزید مؤثر بنانے کی اہمیت پر زور دیا۔
پاکستان اور ناروے نے اس موقع پر دوطرفہ تعاون کے موجودہ دائرہ کار کو مزید وسیع کرنے کے عزم کا اعادہ کرتے ہوئے کہا کہ تجارت، سرمایہ کاری، تعلیم، موسمیاتی تبدیلی اور دیگر شعبوں میں مشترکہ تعاون دونوں ممالک کے باہمی تعلقات کو مزید مستحکم بنانے میں اہم کردار ادا کرسکتا ہے۔
