پاکستان ہاکی کے میدان میں بین الاقوامی سرگرمیوں کی بحالی کے امکانات مزید روشن ہوگئے ہیں۔ پاکستان ہاکی فیڈریشن کے صدر محی الدین احمد وانی کی عالمی ہاکی حکام اور مختلف ممالک کی فیڈریشنز کے عہدیداروں سے اہم ملاقاتوں کے بعد امید پیدا ہوئی ہے کہ اگلے سال یورپ کی ٹاپ ہاکی ٹیمیں دورۂ پاکستان کرسکتی ہیں۔
برسلز میں منعقدہ ایف آئی ایچ ورلڈ کانفرنس کے موقع پر پی ایچ ایف کے صدر محی الدین احمد وانی نے انٹرنیشنل ہاکی فیڈریشن کے صدر طیب اکرام سے اہم ملاقات کی۔ ملاقات میں پاکستان ہاکی کی عالمی سطح پر موجودگی کو مزید مضبوط بنانے، بین الاقوامی روابط بڑھانے اور ملک میں عالمی معیار کی ہاکی سرگرمیوں کے انعقاد سے متعلق مختلف امور پر تفصیلی تبادلہ خیال کیا گیا۔
محی الدین احمد وانی نے کانفرنس کے دوران مختلف ممالک کی ہاکی فیڈریشنز کے سربراہان سے بھی ملاقاتیں کیں۔ ان ملاقاتوں میں پاکستان میں ہاکی کے فروغ، باہمی تعاون اور غیر ملکی ٹیموں کے دورۂ پاکستان کے امکانات پر گفتگو کی گئی۔
پی ایچ ایف کے مطابق ان اہم رابطوں کے نتیجے میں یہ امید پیدا ہوئی ہے کہ اگلے سال یورپ کی ٹاپ ہاکی ٹیمیں پاکستان کا دورہ کریں گی۔ اگر یہ دورے عملی شکل اختیار کرتے ہیں تو پاکستان میں بین الاقوامی ہاکی کی سرگرمیوں کی بحالی کے لیے یہ ایک اہم پیش رفت ہوگی۔
یورپی ٹیموں کے دورۂ پاکستان سے قومی کھلاڑیوں کو عالمی معیار کی ٹیموں کے خلاف کھیلنے اور اپنی صلاحیتیں بہتر بنانے کا بھی موقع ملے گا۔ اس کے علاوہ ملک میں ہاکی کے شائقین کو طویل عرصے بعد بین الاقوامی ٹیموں کو پاکستانی میدانوں میں ایکشن میں دیکھنے کا موقع مل سکتا ہے۔
پاکستان ہاکی فیڈریشن کا کہنا ہے کہ عالمی ہاکی برادری کے ساتھ روابط مزید مستحکم کرنے اور قومی ٹیم کو زیادہ سے زیادہ بین الاقوامی ایکسپوژر فراہم کرنے کے لیے کوششیں جاری ہیں۔ فیڈریشن کی جانب سے مستقبل میں مزید بین الاقوامی مقابلوں اور ٹیموں کے دورۂ پاکستان کے لیے بھی رابطے کیے جارہے ہیں۔
پاکستان ماضی میں عالمی ہاکی کے اہم مراکز میں شمار ہوتا رہا ہے اور قومی ٹیم نے عالمی سطح پر متعدد بڑی کامیابیاں حاصل کی ہیں۔ ایسے میں یورپ کی ٹاپ ٹیموں کا ممکنہ دورہ پاکستان ملکی ہاکی کے لیے نئے دور کا آغاز ثابت ہوسکتا ہے۔
