پاکستانی موسیقی کا عالمی سطح پر چرچا ایک اور تاریخی سنگِ میل تک پہنچ گیا، کوک اسٹوڈیو پاکستان کا مقبول گانا ’پاسوری‘ یوٹیوب پر ایک ارب ویوز حاصل کرنے والا پاکستان میں تیار ہونے والا پہلا میوزک ویڈیو بن گیا ہے۔ علی سیٹھی اور شائے گل کی آواز میں پیش کیا گیا یہ گانا ریلیز کے چار سال سے زائد عرصے بعد اس بڑے اعزاز تک پہنچا۔
کوک اسٹوڈیو پاکستان نے سوشل میڈیا پوسٹ کے ذریعے اس کامیابی کا اعلان کرتے ہوئے دنیا بھر میں گانے کو سننے، شیئر کرنے اور پسند کرنے والے مداحوں کا شکریہ ادا کیا۔ اس موقع پر علی سیٹھی، شائے گل اور پروڈیوسرز ذوالفقار خان المعروف Xulfi اور عبداللہ صدیقی کو بھی خراجِ تحسین پیش کیا گیا۔
’پاسوری‘ کو 7 فروری 2022 کو کوک اسٹوڈیو پاکستان سیزن 14 میں پیش کیا گیا تھا۔ پنجابی اور اردو کے امتزاج، روایتی جنوبی ایشیائی موسیقی اور جدید پاپ پروڈکشن نے اسے منفرد انداز دیا، جبکہ گانے کے موضوعات میں جدائی، محبت اور لوگوں کے درمیان حائل رکاوٹوں کو نمایاں کیا گیا۔
گانے کی مقبولیت پاکستان تک محدود نہیں رہی۔ دستیاب اعداد و شمار کے مطابق اس کے یوٹیوب ویوز کا 90 فیصد سے زیادہ حصہ پاکستان سے باہر کے ناظرین سے آیا، جبکہ ویڈیو کو دنیا کے 60 سے زائد ممالک میں دیکھا گیا۔ اس کے علاوہ یوٹیوب شارٹس پر ’پاسوری‘ سے متعلق 20 لاکھ سے زائد صارفین کی تخلیق کردہ ویڈیوز بھی سامنے آئیں۔
اس گانے نے اسپاٹیفائی پر بھی غیر معمولی کامیابی حاصل کی۔ ’پاسوری‘ 2022 میں اسپاٹیفائی پر سب سے زیادہ اسٹریم کیا جانے والا پاکستانی گانا بنا اور تقریباً 405 ملین اسٹریمز کے ساتھ علی سیٹھی اور شائے گل دونوں کا سب سے زیادہ اسٹریم ہونے والا گانا بھی ہے۔
’پاسوری‘ نے عالمی سطح پر بھی اپنی جگہ بنائی۔ گانا Spotify Global Viral 50 میں تیسرے نمبر تک پہنچا، 2022 میں گوگل پر دنیا بھر میں سب سے زیادہ سرچ کیے جانے والے گانوں میں شامل رہا اور بعد ازاں ڈزنی کی سیریز Ms. Marvel کے ساؤنڈ ٹریک کا حصہ بھی بنا۔
گانے کی مقبولیت نے مختلف ممالک میں اس کے کورز اور نئے ورژنز کو بھی جنم دیا۔ Coke Studio Africa نے اس کا افروبیٹس ریمکس جاری کیا، جبکہ بھارت میں ’Pasoori Nu‘ کے نام سے اس کی نئی شکل 2023 کی فلم Satyaprem Ki Katha میں شامل کی گئی، جسے اریجیت سنگھ نے گایا۔
ایک ارب یوٹیوب ویوز کا یہ سنگِ میل ’پاسوری‘ کو پاکستانی موسیقی کی ان چند کامیاب ترین تخلیقات میں شامل کر دیتا ہے جنہوں نے ملک کی ثقافت اور موسیقی کو عالمی سامعین تک پہنچایا۔
