پاکستان اسٹاک ایکسچینج میں کاروباری ہفتے کے آغاز پر سرمایہ کاروں کو بڑا دھچکا لگا، جہاں ابتدائی ٹریڈنگ کے دوران KSE-100 انڈیکس تقریباً 800 پوائنٹس نیچے آگیا۔
پیر کو صبح 10 بج کر 15 منٹ پر بینچ مارک KSE-100 انڈیکس 772.50 پوائنٹس یا 0.44 فیصد کمی کے بعد 174,556.32 پوائنٹس پر آ گیا۔
مارکیٹ میں فروخت کا دباؤ مختلف اہم شعبوں میں نمایاں رہا، جن میں آٹو موبائل اسمبلی، سیمنٹ، کمرشل بینک، آئل مارکیٹنگ کمپنیاں اور ریفائنریز شامل ہیں۔
گزشتہ ہفتے بھی پاکستان اسٹاک ایکسچینج میں دباؤ برقرار رہا تھا اور KSE-100 انڈیکس مجموعی طور پر 1.3 فیصد کمی کے بعد 175,328.81 پوائنٹس پر بند ہوا تھا۔
مارکیٹ میں موجودہ مندی کی اہم وجوہات میں امریکا اور ایران کے درمیان جاری کشیدگی، عالمی سطح پر تیل کی قیمتوں میں اضافہ اور اس کے نتیجے میں پیدا ہونے والی معاشی غیر یقینی صورتحال شامل ہیں۔
عالمی مارکیٹ میں بھی سرمایہ کاروں کی نظریں خلیج کی صورتحال اور تیل کی قیمتوں پر مرکوز ہیں۔ ایران کی جانب سے آبنائے ہرمز کے باہر محدود بحری زون قائم کرنے کے اعلان نے بھی عالمی توانائی مارکیٹ کے خدشات میں اضافہ کیا ہے۔
عالمی سطح پر برینٹ خام تیل کی قیمت پیر کو مزید بڑھی جبکہ گزشتہ ہفتے بھی اس میں تقریباً 10 فیصد اضافہ ریکارڈ کیا گیا تھا۔ تیل کی قیمتوں میں اضافے سے مہنگائی اور پاکستان کے بیرونی کھاتے پر دباؤ کے خدشات بھی بڑھ گئے ہیں۔
دوسری جانب ایشیائی اسٹاک مارکیٹوں میں مجموعی طور پر مثبت رجحان دیکھا گیا۔ جاپان کا نکیئی انڈیکس تقریباً 2 فیصد جبکہ جنوبی کوریا کی مارکیٹ 3 فیصد تک اوپر گئی۔
