پاکستان کرکٹ ٹیم میں حالیہ بڑی تبدیلیوں کے بعد سابق فاسٹ بولر شعیب اختر نے بھی اپنی رائے کا اظہار کرتے ہوئے نوجوان اور ملک کے لیے کھیلنے کا جذبہ رکھنے والے کھلاڑیوں کو آگے لانے کی حمایت کردی ہے۔
ایک پروگرام میں گفتگو کرتے ہوئے شعیب اختر نے کہا کہ پاکستان کرکٹ بورڈ موجودہ ٹیسٹ اسکواڈ کی کارکردگی سے خوش نہیں اور ٹیم کو نئے سرے سے تشکیل دینے کی جانب بڑھ رہا ہے۔ ان کے مطابق قومی ٹیم کی بہتری کے لیے نوجوان کھلاڑیوں کو مواقع دینا ضروری ہے۔
شعیب اختر نے خاص طور پر شاہین شاہ آفریدی، نسیم شاہ اور حارث رؤف کے کیریئر کو محفوظ رکھنے پر زور دیا۔ ان کا کہنا تھا کہ ان تینوں کھلاڑیوں میں پاکستان کرکٹ کو مزید بہت کچھ دینے کی صلاحیت موجود ہے۔
دوسری جانب شعیب اختر کی جانب سے مستقبل کے لیے تجویز کردہ تین کھلاڑیوں کی فہرست میں بابر اعظم کا نام شامل نہیں۔ پاکستان کرکٹ بورڈ نے انگلینڈ کے خلاف تیسرے ٹیسٹ سے قبل اسکواڈ میں پہلے ہی بڑی تبدیلیاں کرتے ہوئے سات کھلاڑیوں کو ریلیز کیا، جبکہ سرفراز احمد اور عمر گل کو بھی کوچنگ اسٹاف سے الگ کردیا گیا۔
ان تبدیلیوں کے بعد پاکستان نے تیسرے ٹیسٹ کے لیے متعدد نئے اور کم تجربہ کار کھلاڑیوں کو اسکواڈ میں شامل کیا ہے، جس سے واضح ہوتا ہے کہ ٹیم مینجمنٹ مستقبل کے لیے نئے چہروں کو آزمانے کی پالیسی پر عمل پیرا ہے۔
بابر اعظم انگلینڈ کے خلاف پہلے ٹیسٹ میں انجری کے باعث دستیاب نہیں تھے، جبکہ دوسرے ٹیسٹ میں ان کی کارکردگی توقعات کے مطابق نہ رہی اور انہوں نے بالترتیب 8 اور 6 رنز بنائے۔
