پاکستانی اداکار اور ٹی وی میزبان عدنان صدیقی نے معروف بھارتی انٹرٹینر راکھی ساونت کی مقبول پاکستانی ریئلٹی شو تماشا میں ممکنہ شرکت کے حوالے سے سامنے آنے والی قیاس آرائیوں پر اپنی رائے کا اظہار کردیا۔
حالیہ انٹرویو کے دوران عدنان صدیقی سے سوال کیا گیا کہ اگر راکھی ساونت کو تماشا کا حصہ بنایا جائے تو کیا وہ بطور میزبان انہیں سنبھال سکیں گے؟ سوال سن کر اداکار نے مسکراتے ہوئے اس خیال کو ایک طرح کا ’’خواب‘‘ قرار دیا، تاہم انہوں نے موجودہ حالات میں دونوں ممالک کے فنکاروں کے درمیان ایسے پروگراموں میں شرکت کو مشکل بھی قرار دیا۔
انٹرویو کے دوران اس بات کا ذکر کیا گیا کہ ماضی میں پاکستان اور بھارت کے فنکار ایک دوسرے کے ریئلٹی شوز میں شرکت کرتے رہے ہیں۔ عدنان صدیقی نے بھی اس بات سے اتفاق کیا کہ موجودہ حالات میں اس نوعیت کا تعاون آسان نہیں رہا۔
تاہم انہوں نے راکھی ساونت کے حوالے سے کہا کہ اگر وہ کبھی تماشا کا حصہ بنیں تو یقیناً پروگرام کیلئے بہت زیادہ تفریح کا باعث بنیں گی۔ عدنان صدیقی نے اس موقع پر کہا کہ اگر راکھی شو میں آئیں تو وہ بہت زیادہ انٹرٹیننگ ثابت ہوں گی۔
عدنان صدیقی نے گفتگو کے دوران تماشا کی پاکستان سے باہر مقبولیت کا بھی ذکر کیا اور پہلے سیزن کے دوران بھارتی کامیڈین جانی لیور کی جانب سے انہیں کی جانے والی ایک فون کال کو یاد کیا۔
اداکار کے مطابق وہ اور جانی لیور اس وقت تک ایک دوسرے سے نہ ملے تھے اور نہ ہی ان کی فون پر گفتگو ہوئی تھی، تاہم بھارتی کامیڈین نے ذاتی طور پر انہیں فون کرکے بطور میزبان ان کی کارکردگی کو سراہا تھا۔ عدنان کے مطابق جانی لیور نے ان سے کہا تھا کہ وہ بہت اچھا کام کررہے ہیں۔
عدنان صدیقی نے بتایا کہ ممکنہ طور پر جانی لیور کو ان کا رابطہ نمبر پاکستانی کامیڈین رؤف لالا کے ذریعے ملا ہوگا۔ انہوں نے مزید کہا کہ تماشا نے اپنے آغاز کے بعد بھارتی ناظرین میں بھی جگہ بنائی ہے اور سرحد پار ناظرین اور کانٹینٹ کری ایٹرز پروگرام کو دیکھتے اور اس پر اپنی آرا کا اظہار کرتے ہیں۔
عدنان صدیقی نے 1990 کی دہائی میں اداکاری کا آغاز کیا اور 1994 کے پی ٹی وی ڈرامے عروسہ سے ٹیلی ویژن پر قدم رکھا۔ بعد ازاں انہوں نے پاکستانی ڈرامہ انڈسٹری میں نمایاں مقام حاصل کیا اور میرے پاس تم ہو سمیت متعدد کامیاب ڈراموں میں اداکاری کی۔
ان کا فنی سفر صرف پاکستان تک محدود نہیں رہا بلکہ انہوں نے ہالی ووڈ فلم اے مائٹی ہارٹ میں انجلینا جولی کے ساتھ بھی کام کیا جبکہ بالی ووڈ فلم مام میں بھی اداکاری کے جوہر دکھائے۔ اداکاری اور میزبانی کے علاوہ عدنان صدیقی بطور پروڈیوسر بھی کام کرچکے ہیں اور انہوں نے سیریل انٹرٹینمنٹ کی بنیاد رکھی۔
