ملک بھر میں عید میلاد النبی ﷺ انتہائی مذہبی عقیدت، جوش و خروش اور احترام کے ساتھ منائی گئی، جبکہ ملک کے مختلف شہروں میں میلاد جلوس، مذہبی اجتماعات، قرآن خوانی اور خصوصی دعاؤں کا اہتمام کیا گیا۔
دن کا آغاز اسلام آباد میں 31 توپوں جبکہ صوبائی دارالحکومتوں، مظفرآباد اور گلگت بلتستان میں 21،21 توپوں کی سلامی سے ہوا۔ مساجد میں قرآن خوانی کی گئی اور نماز فجر کے بعد ملک میں امن، خوشحالی اور ترقی کے لیے خصوصی دعائیں مانگی گئیں۔
ملک کے مختلف شہروں اور قصبوں میں میلاد کے جلوس اور مذہبی اجتماعات منعقد ہوئے جن میں بڑی تعداد میں عاشقانِ رسول ﷺ نے شرکت کی۔ گلیوں، بازاروں اور محلوں کو برقی قمقموں سے سجایا گیا جبکہ عمارتوں اور سڑکوں پر سبز پرچم اور جھنڈیاں آویزاں کی گئیں۔ عاشقانِ رسول ﷺ نے درود شریف کا ورد کرتے ہوئے اپنی محبت و عقیدت کا اظہار کیا۔
صدر آصف علی زرداری نے اپنے پیغام میں پاکستان اور عالم اسلام کے مسلمانوں کو عید میلاد النبی ﷺ کی مبارکباد دیتے ہوئے کہا کہ حضور اکرم ﷺ کی سیرت اور تعلیمات پوری انسانیت کے لیے رہنمائی کا ذریعہ ہیں۔ انہوں نے کہا کہ ان تعلیمات پر عمل پیرا ہو کر مسلمان انفرادی اور اجتماعی سطح پر کامیابی حاصل کر سکتے ہیں۔
صدر نے بین المسالک ہم آہنگی کو مضبوط بنانے پر زور دیتے ہوئے نوجوانوں پر بھی زور دیا کہ وہ اپنی زندگیوں کو سیرت النبی ﷺ کے مطابق ڈھالیں۔
وزیراعظم شہباز شریف نے بھی امت مسلمہ کو عید میلاد النبی ﷺ کی مبارکباد دی اور کہا کہ حضور اکرم ﷺ کی تعلیمات تمام مسلمانوں کے لیے رہنمائی فراہم کرتی ہیں۔
وزیر داخلہ محسن نقوی نے کہا کہ نبی کریم ﷺ نے محبت، اخوت، برداشت اور انسانیت کا عالمگیر پیغام دیا۔ انہوں نے مسلمانوں پر زور دیا کہ معاشرے کو درپیش مشکلات اور انتشار پر قابو پانے کے لیے سیرت النبی ﷺ اور آپ ﷺ کی تعلیمات پر عمل کیا جائے۔
عید میلاد النبی ﷺ کے جلوسوں اور اجتماعات کے لیے ملک بھر میں سیکیورٹی کے وسیع انتظامات کیے گئے۔ لاہور میں 128 مذہبی اجتماعات اور 173 جلوسوں و اجتماعات کی سیکیورٹی کے لیے 7 ہزار سے زائد پولیس افسران اور اہلکار تعینات کیے گئے۔
لاہور کا مرکزی میلاد جلوس دہلی گیٹ سے شروع ہو کر مقررہ راستوں سے گزرتا ہوا داتا دربار پر اختتام پذیر ہوگا۔ سی سی پی او لاہور بلال صدیق کمیانہ نے کہا کہ پرامن تقریبات کے لیے جامع سیکیورٹی انتظامات کیے گئے ہیں۔ انہوں نے پولیس افسران کو علما کرام اور امن کمیٹیوں کے ساتھ قریبی رابطہ رکھنے، شرپسند عناصر پر نظر رکھنے اور شہر کے داخلی و خارجی راستوں پر سیکیورٹی مزید مؤثر بنانے کی ہدایت کی۔
بین المذاہب ہم آہنگی کی خوبصورت مثال اس وقت سامنے آئی جب نارووال میں سکھ برادری کے افراد نے بھی عید میلاد النبی ﷺ کی تقریبات میں بھرپور شرکت کی۔ سکھ شہریوں نے میلاد جلوس کے شرکا پر گلاب کی پتیاں نچھاور کیں اور اس پُرمسرت موقع پر مٹھائیاں بھی تقسیم کیں۔
