آبنائے ہرمز: عالمی تجارت اور توانائی کی اہم ترین گزرگاہ آبنائے ہرمز میں ایک تیل بردار ٹینکر کو ڈرون حملے کا نشانہ بنایا گیا، جس کے نتیجے میں جہاز کو معمولی نقصان پہنچا، تاہم ٹینکر پر سوار تمام افراد محفوظ رہے اور کسی جانی نقصان کی اطلاع نہیں ملی۔
برطانیہ کی میری ٹائم ٹریڈ آپریشنز ایجنسی کے مطابق اسے فوجی حکام کی جانب سے اطلاع موصول ہوئی کہ آبنائے ہرمز سے باہر نکلنے کی سمت سفر کرنے والے ایک تیل بردار ٹینکر کو بغیر پائلٹ فضائی گاڑی کے ذریعے نشانہ بنایا گیا۔
برطانوی میری ٹائم ایجنسی نے بتایا کہ ڈرون حملے کے نتیجے میں جہاز کو معمولی نقصان پہنچا، تاہم ٹینکر پر موجود تمام عملے کی حفاظت کی تصدیق کرلی گئی ہے اور کسی شخص کے زخمی یا ہلاک ہونے کی اطلاع نہیں ہے۔
ایجنسی کے مطابق واقعے کے بعد سمندر یا ماحول کو بھی کسی قسم کا نقصان پہنچنے کی اطلاع سامنے نہیں آئی۔ حکام کا کہنا ہے کہ ٹینکر سے تیل یا کسی دوسرے مواد کے سمندر میں اخراج کی کوئی اطلاع نہیں ملی۔
یہ واقعہ اس وقت پیش آیا جب مذکورہ ٹینکر آبنائے ہرمز سے باہر نکلنے کے لیے سفر کر رہا تھا۔ آبنائے ہرمز دنیا کی اہم ترین بحری گزرگاہوں میں شمار ہوتی ہے اور عالمی سطح پر تیل اور دیگر توانائی کے وسائل کی ترسیل میں اس کی انتہائی اہمیت ہے۔
حالیہ دنوں میں آبنائے ہرمز کے اطراف بحری جہازوں سے متعلق متعدد واقعات سامنے آنے کے بعد اس اہم سمندری راستے کی سکیورٹی پر عالمی سطح پر تشویش میں اضافہ ہوا ہے۔
تاحال کسی فریق نے ڈرون حملے کی ذمہ داری قبول نہیں کی۔ حکام کی جانب سے واقعے کی تحقیقات جاری ہیں، جبکہ حملے میں استعمال ہونے والے ڈرون اور واقعے کے دیگر پہلوؤں سے متعلق مزید معلومات بھی سامنے آنا باقی ہیں۔
