کوئٹہ: بلوچستان میں گیس کی فراہمی کو بڑا دھچکا اس وقت لگا جب بولان کے علاقے میں مرکزی گیس پائپ لائن دھماکے سے متاثر ہوگئی، جس کے نتیجے میں کوئٹہ سمیت کئی شہروں اور علاقوں میں گیس کی معمول کی فراہمی معطل یا شدید متاثر ہوگئی ہے۔
واقعہ بولان ریور بیڈ میں گورکٹ کے قریب KMP-246 والو اسمبلی پر پیش آیا، جہاں 18 انچ قطر کی مرکزی گیس پائپ لائن میں زور دار دھماکا ہوا۔ دھماکے کے بعد پائپ لائن میں آگ بھڑک اٹھی اور بلند شعلے کافی فاصلے سے بھی دکھائی دیے۔
گیس سپلائی کے متاثر ہونے کے باعث کولپور، مچھ، مستونگ، قلات، پشین اور زیارت سمیت متعدد علاقوں میں گیس کی فراہمی روک دی گئی ہے، جبکہ کوئٹہ کے بعض علاقوں میں بھی گیس پریشر کم ہونے کا امکان ظاہر کیا گیا ہے۔
متعلقہ گیس کمپنی کے مطابق متاثرہ والو اسمبلی کوئٹہ-سبی روڈ سے تقریباً 700 سے 800 میٹر کے فاصلے پر واقع ہے۔ دھماکے کے بعد علاقے میں سکیورٹی صورتحال کے باعث مرمتی ٹیموں کو فوری طور پر جائے وقوعہ تک پہنچنے کی اجازت نہیں مل سکی۔
حکام کا کہنا ہے کہ متاثرہ مقام پر مرمت کا کام تاحال شروع نہیں ہوسکا کیونکہ سکیورٹی کلیئرنس کا انتظار ہے۔ مرمتی ٹیمیں تیار ہیں اور سکیورٹی اجازت ملتے ہی انہیں متاثرہ مقام پر روانہ کردیا جائے گا۔
گیس کمپنی کی انتظامیہ صورتحال کی مسلسل نگرانی کررہی ہے اور سپلائی بحال کرنے کے لیے ضروری اقدامات کیے جارہے ہیں۔ حکام نے یقین دہانی کرائی ہے کہ سکیورٹی کلیئرنس ملنے کے بعد مرمت کا عمل جلد شروع کرنے کی کوشش کی جائے گی۔
گیس کی بندش یا کم پریشر کے باعث متاثرہ علاقوں میں گھریلو صارفین کے ساتھ ساتھ کاروباری اور صنعتی سرگرمیاں بھی متاثر ہونے کا خدشہ ہے۔ خاص طور پر سرد موسم میں گیس کی مسلسل فراہمی شہریوں کے لیے اہم ہوتی ہے، اس لیے طویل بندش سے مشکلات میں اضافہ ہوسکتا ہے۔
متعلقہ ادارے نے واقعے کے باعث صارفین کو پیش آنے والی مشکلات پر افسوس کا اظہار کرتے ہوئے کہا ہے کہ صورتحال معمول پر لانے اور گیس کی فراہمی جلد از جلد بحال کرنے کے لیے کوششیں جاری ہیں۔
