ملک میں بڑھتی آبادی اور انتظامی امور کو بہتر بنانے کے معاملے پر ایم کیو ایم پاکستان نے نئے انتظامی یونٹس کے قیام اور شفاف مردم شماری کا مطالبہ کردیا ہے۔ چیئرمین خالد مقبول صدیقی کا کہنا ہے کہ آبادی کے درست اعداد و شمار کے بغیر وسائل اور اختیارات کی منصفانہ تقسیم ممکن نہیں۔
کراچی میں مرکزی رہنماؤں کے ہمراہ پریس کانفرنس کرتے ہوئے خالد مقبول صدیقی نے کہا کہ پاکستان میں زیادہ سے زیادہ انتظامی یونٹس قائم کیے جانے چاہئیں، کیونکہ بڑھتی ہوئی آبادی کے پیش نظر موجودہ انتظامی ڈھانچے پر نظرثانی ضروری ہوگئی ہے۔
انہوں نے گزشتہ روز کراچی میں ہونے والی جماعت کی ریلی کو عوامی اظہارِ رائے قرار دیتے ہوئے کہا کہ ان کے مطابق شہریوں نے رکاوٹوں کے باوجود اپنے مطالبات کے حق میں آواز اٹھائی۔ خالد مقبول صدیقی نے کہا کہ ایم کیو ایم انتظامی یونٹس کے قیام کو لسانی بنیادوں کے بجائے انتظامی بنیادوں پر دیکھتی ہے۔
خالد مقبول صدیقی نے شفاف اور منصفانہ مردم شماری کا مطالبہ کرتے ہوئے کہا کہ ملک میں آبادی کے درست اعداد و شمار سامنے لائے جائیں تاکہ انتظامی اور وسائل سے متعلق فیصلے بہتر بنیادوں پر کیے جاسکیں۔ انہوں نے یہ بھی کہا کہ ایم کیو ایم کے مطابق کراچی کی آبادی کے اعداد و شمار ماضی میں درست طور پر سامنے نہیں آئے۔
انہوں نے کہا کہ شہری سندھ کے مسائل اور انتظامی معاملات پر عدالتوں سے بھی نوٹس لینے کا مطالبہ کیا گیا ہے۔ ان کے مطابق گزشتہ کئی دہائیوں کے انتظامی معاملات اور شہری علاقوں سے متعلق شکایات کا جائزہ لینے کے لیے عدالتی کمیشن کا قیام بھی ضروری ہے۔
ایم کیو ایم چیئرمین نے کہا کہ ان کی جماعت نئے انتظامی یونٹس کے مطالبے کو سیاسی اور قانونی فورمز پر بھی اٹھاتی رہی ہے اور آئندہ بھی عوامی رابطہ مہم جاری رکھے گی۔
دوسری جانب ڈاکٹر فاروق ستار نے کہا کہ انتظامی یونٹس کے قیام سے کراچی کے علاوہ لاڑکانہ، سکھر، نواب شاہ، میرپورخاص اور حیدرآباد سمیت سندھ کے دیگر شہروں کے انتظامی مسائل پر بھی توجہ دی جاسکتی ہے۔ ان کے مطابق اختیارات اور وسائل کو مقامی سطح تک منتقل کرنے سے شہریوں کو بنیادی سہولیات تک بہتر رسائی مل سکتی ہے۔
