ریاض: پاکستانی تعلیمی ٹیکنالوجی کے ادارے ایڈورسٹی نے سعودی عرب کی رپیڈیو گروپ سے اہم تزویراتی سرمایہ کاری حاصل کرلی، جس کے بعد مصنوعی ذہانت پر مبنی اس کے تعلیمی پلیٹ فارم کو سعودی عرب، خلیجی تعاون کونسل کے ممالک اور عالمی منڈیوں تک وسعت دینے کی راہ ہموار ہوگئی ہے۔
دونوں کمپنیوں نے سعودی عرب میں منعقد ہونے والی ٹیکنالوجی اور جدت کی بڑی نمائش لیپ 2026 کے دوران مفاہمت کی یادداشت پر دستخط کیے۔ معاہدے کا مقصد ٹیکنالوجی، تعلیم اور افرادی قوت کی ترقی کے شعبوں میں باہمی تعاون کو فروغ دینا ہے۔
تقریب میں وفاقی وزیر برائے اطلاعاتِ ٹیکنالوجی و ٹیلی کمیونیکیشن شزا خواجہ نے بھی شرکت کی۔
ایڈورسٹی کے مطابق اس شراکت داری کے ذریعے ادارے کو سرمایہ، انجینئرنگ کی صلاحیت، انتظامی مہارت اور بین الاقوامی کاروباری روابط تک رسائی حاصل ہوگی، جس سے اس کی آئندہ ترقی میں مدد ملے گی۔
برج اسٹارٹ پاکستان کے ذریعے بھی ایڈورسٹی کو سعودی عرب میں توسیع کیلئے معاونت حاصل ہوئی، جس میں دی گیراج کے تیز رفتار ترقیاتی پروگرام میں شرکت شامل ہے۔ اس پروگرام کے ذریعے ادارے کو سعودی ٹیکنالوجی کے شعبے، نئی منڈیوں، کاروباری روابط اور بین الاقوامی سطح پر توسیع کے مواقع تک رسائی ملی۔
پاکستان میں 2021 میں قائم ہونے والے ایڈورسٹی کو وزارتِ آئی ٹی و ٹیلی کمیونیکیشن کے تحت اگنائٹ کی معاونت حاصل رہی ہے۔ ادارے کے مطابق اب تک 12 ہزار 500 سے زائد افراد کو مصنوعی ذہانت، سائبر سیکیورٹی، کلاؤڈ کمپیوٹنگ، معلوماتی اعداد و شمار، بلاک چین اور دیگر جدید ٹیکنالوجیز میں تربیت دی جاچکی ہے۔
ادارے کا کہنا ہے کہ منتخب تربیتی گروپس میں ملازمت حاصل کرنے کی شرح 70 فیصد سے زائد رہی ہے۔
رپیڈیو گروپ کے مطابق اس تزویراتی سرمایہ کاری سے ایڈورسٹی کی عالمی سطح پر توسیع اور مصنوعی ذہانت پر مبنی تعلیمی پلیٹ فارم کی مزید ترقی میں مدد ملے گی۔
رپیڈیو گروپ نے کہا کہ مفاہمت کی یادداشت تعاون کو مضبوط بنانے، جدت کو فروغ دینے اور مستقبل میں نئے مواقع پیدا کرنے کی جانب اہم قدم ہے۔
ایڈورسٹی کے مطابق یہ شراکت داری پاکستان کے ٹیکنالوجی اور تعلیمی شعبے پر بڑھتے ہوئے عالمی اعتماد کی عکاسی کرتی ہے اور اس بات کا ثبوت ہے کہ پاکستانی نئے کاروباری ادارے عالمی منڈیوں کیلئے جدید حل تیار کرنے کی صلاحیت رکھتے ہیں۔
ایڈورسٹی کی ٹیم نے لیپ 2026 میں مصنوعی ذہانت کی تعلیم اور افرادی قوت کی ترقی کے مستقبل سے متعلق مختلف مباحث میں حصہ لیا جبکہ رپیڈیو گروپ کی دیگر کمپنیوں ریپکس اور اُول سینس کے ساتھ بھی نمائش میں شرکت کی۔
ریاض میں 31 اگست سے 3 ستمبر تک جاری رہنے والی لیپ 2026 میں دنیا بھر سے ٹیکنالوجی کے ماہرین، نئے کاروباری اداروں، سرمایہ کاروں، پالیسی سازوں اور جدت کاروں نے شرکت کی۔
رپیڈیو گروپ ذہین سافٹ ویئر اور محفوظ ہارڈویئر تیار کرنے کے شعبے میں کام کرتی ہے۔
