کراچی: عالمی منڈی میں خام تیل کی قیمتوں میں کمی کا سلسلہ جاری ہے، سعودی عرب کی اہم ایسٹ ویسٹ تیل پائپ لائن کی بحالی اور امریکا ایران سفارتی رابطوں سے عالمی سپلائی بہتر ہونے کی توقعات نے قیمتوں پر دباؤ بڑھا دیا ہے۔ تازہ مارکیٹ اعداد و شمار میں برینٹ خام تیل 100 ڈالر فی بیرل سے نیچے رہا۔
سعودی عرب نے ڈرون حملے کے بعد بند ہونے والی ایسٹ ویسٹ پائپ لائن میں دوبارہ تیل کی ترسیل شروع کردی ہے۔ یہ پائپ لائن سعودی تیل کو مشرقی علاقوں سے بحیرہ احمر کی جانب ینبع بندرگاہ تک منتقل کرنے میں اہم کردار ادا کرتی ہے اور اس کے ذریعے آبنائے ہرمز کو بائی پاس کرنے کا راستہ دستیاب ہوتا ہے۔
رپورٹس کے مطابق پائپ لائن کی بحالی ابتدائی طور پر محدود رفتار سے شروع ہوئی ہے، جبکہ مکمل صلاحیت بحال ہونے میں مزید وقت لگ سکتا ہے۔ اس راستے سے تقریباً 40 لاکھ بیرل یومیہ تیل منتقل کیا جاسکتا ہے، جو عالمی تیل سپلائی کا تقریباً 4 فیصد بنتا ہے۔
دوسری جانب اقوام متحدہ کی جنرل اسمبلی کے اجلاس کے موقع پر امریکا اور ایران کے درمیان جاری سفارتی رابطوں سے بھی عالمی منڈی میں یہ توقع پیدا ہوئی ہے کہ خطے میں کشیدگی کم ہونے کی صورت میں تیل کی سپلائی مزید بہتر ہوسکتی ہے۔ اسی توقع نے بھی خام تیل کی قیمتوں کو دباؤ میں رکھا ہے۔
تازہ کاروباری اعداد و شمار کے مطابق بدھ کو برینٹ خام تیل تقریباً 98 سے 99 ڈالر فی بیرل کے درمیان جبکہ امریکی ویسٹ ٹیکساس انٹرمیڈیٹ تقریباً 89 سے 90 ڈالر فی بیرل کے قریب رہا، البتہ قیمتیں کاروباری اوقات کے دوران مسلسل تبدیل ہوتی رہیں۔
سعودی عرب کی سپلائی بحالی کے ساتھ آبنائے ہرمز میں بھی تیل کی نقل و حرکت میں بہتری کے اشارے عالمی مارکیٹ کے لیے اہم ہیں۔ تاہم خطے کی مجموعی صورتحال اور امریکا ایران مذاکرات کی پیش رفت اب بھی تیل کی قیمتوں کے لیے اہم عوامل ہیں۔
