سوشل میڈیا کمپنیاں مشکل میں؟ 3 ہزار سے زائد مقدمات پر امریکی عدالت کا بڑا حکم
امریکی اپیل عدالت نے Meta، Google، TikTok اور Snapchat کے خلاف دائر 3 ہزار سے زائد مقدمات کو آگے بڑھانے کی اجازت دے دی ہے۔ ان مقدمات میں الزام عائد کیا گیا ہے کہ ان کمپنیوں کے سوشل میڈیا پلیٹ فارمز کو اس انداز میں ڈیزائن کیا گیا جس سے نوجوان صارفین میں انحصار اور لت بڑھنے کا خطرہ پیدا ہوا۔
امریکی عدالتِ اپیل کی نویں سرکٹ نے Meta اور TikTok کی اپیل مسترد کرتے ہوئے قرار دیا کہ کمپنیوں نے نچلی عدالت کے فیصلے کو اس مرحلے پر چیلنج کیا جب مقدمات میں حتمی فیصلہ سامنے نہیں آیا تھا۔
کمپنیوں کا مؤقف تھا کہ Communications Decency Act کی Section 230 انہیں پلیٹ فارمز کے ڈیزائن، مبینہ طور پر نشہ آور خصوصیات اور حفاظتی انتباہات سے متعلق مقدمات سے تحفظ فراہم کرتی ہے۔ تاہم عدالت نے قرار دیا کہ Section 230 مقدمات سے مکمل استثنیٰ نہیں بلکہ قانونی ذمہ داری کے خلاف دفاع فراہم کرتی ہے۔
عدالت کے فیصلے کے بعد کمپنیاں جاری مقدمات میں اپنے قانونی مؤقف کا دفاع کر سکیں گی، تاہم مدعیان کو بھی سوشل میڈیا کے نوجوان صارفین پر اثرات سے متعلق شواہد پیش کرنے کا موقع ملے گا۔
دوسری جانب عدالت نے Meta کی جانب سے 29 امریکی ریاستوں کے اٹارنی جنرلز کی جانب سے دائر مقدمے کے ٹرائل میں تاخیر کی درخواست بھی مسترد کردی۔ ریاستوں نے الزام عائد کیا ہے کہ Meta نے بچوں کا ڈیٹا جمع کیا، نوجوان صارفین کو زیادہ دیر تک پلیٹ فارم پر رکھنے کے لیے ڈیزائن تیار کیے اور آن لائن تحفظ سے متعلق صارفین کو گمراہ کن معلومات فراہم کیں۔
وسیع تر قانونی کارروائی میں والدین، اسکول اضلاع، مقامی اداروں اور انفرادی صارفین کے مقدمات بھی شامل ہیں۔ ان میں دعویٰ کیا گیا ہے کہ سوشل میڈیا کے استعمال نے نوجوانوں میں ڈپریشن، اضطراب، جسمانی خدوخال سے متعلق عدم اطمینان اور ذہنی صحت کے بڑھتے بحران میں کردار ادا کیا۔
کیلیفورنیا کی ریاستی عدالت میں بھی اسی نوعیت کے تقریباً 3,300 مقدمات کو یکجا کیا گیا ہے۔
اس سے قبل رواں سال لاس اینجلس کی ایک جیوری نے Meta اور Google کو نوجوانوں کو نقصان پہنچانے والے پلیٹ فارم ڈیزائن کے معاملے میں غفلت کا مرتکب قرار دیتے ہوئے ایک نوجوان خاتون کو 60 لاکھ ڈالر ہرجانہ دینے کا حکم دیا تھا۔ خاتون کا کہنا تھا کہ وہ بچپن میں Instagram اور YouTube کی عادی ہوگئی تھیں۔ دونوں کمپنیوں نے الزامات مسترد کرتے ہوئے فیصلے کے خلاف اپیل کرنے کا اعلان کیا ہے۔
