کراچی: پاکستان پیپلزپارٹی کے چیئرمین بلاول بھٹو زرداری نے اپنی نجی زندگی سے متعلق سوشل میڈیا پر گردش کرنے والی منگنی اور شادی کی خبروں پر واضح مؤقف دیتے ہوئے تمام قیاس آرائیوں کو مسترد کردیا ہے۔ بلاول بھٹو نے کہا ہے کہ نہ ان کی منگنی ہوئی ہے اور نہ ہی شادی، جبکہ سوشل میڈیا پر اس حوالے سے پھیلائی جانے والی خبریں حقیقت پر مبنی نہیں۔
بلاول بھٹو نے اپنے ویڈیو بیان میں سوشل میڈیا پر زیرِ گردش خبروں پر ردعمل دیتے ہوئے کہا کہ معاملہ ابتدا میں صرف ’’بات پکی‘‘ ہونے کی اطلاعات تک محدود تھا، لیکن سوشل میڈیا پر اسے منگنی اور پھر شادی تک پہنچا دیا گیا، حالانکہ حقیقت میں ایسا کچھ نہیں ہوا۔
انہوں نے واضح الفاظ میں کہا کہ ان کی نہ منگنی ہوئی ہے اور نہ شادی ہوئی ہے، اس لیے اس حوالے سے سامنے آنے والی خبروں اور دعوؤں کو درست قرار نہیں دیا جاسکتا۔
پیپلزپارٹی کے چیئرمین نے کہا کہ سوشل میڈیا پر بعض اوقات معمولی یا غیر مصدقہ باتوں کو بڑھا چڑھا کر پیش کیا جاتا ہے، جس سے ایسی قیاس آرائیاں جنم لیتی ہیں جو بعد میں خبروں کی شکل اختیار کرلیتی ہیں۔
بلاول بھٹو کی جانب سے یہ وضاحت ایسے وقت میں سامنے آئی ہے جب گزشتہ کچھ عرصے سے ان کی شادی اور ذاتی زندگی سے متعلق مختلف دعوے سوشل میڈیا پر گردش کر رہے تھے۔ ان کے تازہ بیان کے بعد انہوں نے خود ان تمام افواہوں کی تردید کرتے ہوئے صورتحال واضح کردی ہے۔
