ایران کو درپیش فوجی، معاشی اور سیاسی چیلنجز کے تناظر میں رہبرِ اعلیٰ مجتبیٰ خامنہ ای اور پارلیمنٹ کے اسپیکر محمد باقر قالیباف کے درمیان ملاقات ہوئی، جس میں ملک کی موجودہ صورت حال، امریکا اور اسرائیل کے ساتھ کشیدگی اور عوام کو درپیش معاشی مشکلات پر تبادلہ خیال کیا گیا۔
رپورٹ کے مطابق ملاقات کے دوران مجتبیٰ خامنہ ای نے ایران کے خلاف امریکا اور اسرائیل کی جنگ کے فوجی، معاشی اور ذہنی محاذوں کا ذکر کرتے ہوئے قومی اتحاد اور سماجی ہم آہنگی برقرار رکھنے کی اہمیت پر زور دیا۔ انہوں نے ملک کی دفاعی اور دیگر صلاحیتوں کو مضبوط بنانے میں پارلیمنٹ کے کردار کو بھی اہم قرار دیا۔
مجتبیٰ خامنہ ای نے حکومت اور پارلیمنٹ پر زور دیا کہ وہ عوام کو درپیش معاشی مسائل کے حل کے لیے مشترکہ کوششیں کریں۔ انہوں نے ایران کے تزویراتی شراکت داروں سے متعلق امور کو آگے بڑھانے کی ضرورت پر بھی توجہ دلائی۔
تاہم ملاقات کی تاریخ، دورانیے اور زیرِ بحث معاملات سے متعلق کسی مخصوص فیصلے کی تفصیلات سامنے نہیں آئیں۔ یہ بھی واضح نہیں کیا گیا کہ معاشی مشکلات کے حل یا تزویراتی شراکت داروں کے حوالے سے کوئی عملی فیصلہ کیا گیا ہے یا نہیں۔
واضح رہے کہ امریکا اور اسرائیل کے حملے میں سابق سپریم لیڈر علی خامنہ ای کی شہادت کے بعد ان کے بیٹے مجتبیٰ خامنہ ای نے قیادت سنبھالی۔ رپورٹ کے مطابق وہ اب تک منظرِ عام پر نہیں آئے اور نہ ہی ان کی کوئی تصویر یا ویڈیو سامنے آئی ہے۔
