واشنگٹن: ایران کے ساتھ بڑھتی کشیدگی اور ممکنہ نئی امریکی فوجی کارروائی کے خدشات کے درمیان امریکا نے سعودی عرب اور قطر میں مزید دو پیٹریاٹ میزائل دفاعی بیٹریاں تعینات کردی ہیں، جن کا مقصد دونوں ممالک کی اہم تیل اور گیس تنصیبات کو ممکنہ حملوں سے تحفظ فراہم کرنا ہے۔
رپورٹ کے مطابق ایک پیٹریاٹ بیٹری گزشتہ ماہ سعودی عرب بھیجی گئی، جہاں اسے ایک اہم تیل تنصیب کے دفاع کیلئے تعینات کیا گیا، جبکہ دوسری بیٹری قطر پہنچائی گئی ہے تاکہ قدرتی گیس کی اہم تنصیب کو تحفظ فراہم کیا جاسکے۔
امریکی حکام کے مطابق ان دفاعی نظاموں کی تعیناتی کا ایک مقصد سعودی عرب اور قطر کو یہ یقین دہانی کرانا بھی ہے کہ اگر ایران کے خلاف بڑے پیمانے پر فوجی کارروائیاں دوبارہ شروع ہوتی ہیں تو واشنگٹن ان کے اہم توانائی کے بنیادی ڈھانچے کے تحفظ میں مدد کرے گا۔
سعودی عرب اور قطر کی قیادت اس سے قبل ایران کے خلاف ممکنہ امریکی کارروائی پر تشویش کا اظہار کرچکی ہے، کیونکہ تہران کی جانب سے جوابی کارروائی کی صورت میں خلیجی ممالک کی تیل اور گیس تنصیبات بھی نشانہ بن سکتی ہیں۔
یہ پیش رفت ایسے وقت میں سامنے آئی ہے جب امریکا مشرق وسطیٰ میں اپنی فوجی موجودگی بڑھا رہا ہے اور مزید بحری جہاز، جنگی طیارے اور فوجی وسائل خطے کی جانب منتقل کیے جا رہے ہیں۔
پیٹریاٹ دفاعی نظاموں کی نئی تعیناتی سے خلیجی ممالک کی اہم توانائی تنصیبات کے تحفظ پر امریکی توجہ مزید واضح ہوگئی ہے، جبکہ ایران کے ساتھ کشیدگی کے باعث خطے میں ممکنہ فوجی کارروائی کے حوالے سے صورتحال مسلسل زیرِ نگرانی ہے۔ Axios
