وزیراعظم محمد شہباز شریف اقوام متحدہ کے 81ویں جنرل اسمبلی اجلاس میں پاکستان کی نمائندگی اور اہم سفارتی ملاقاتوں کے بعد وطن واپس پہنچ گئے۔ وزیراعظم نے دورے کے دوران عالمی سطح پر پاکستان کا مؤقف پیش کرنے کے ساتھ مختلف عالمی رہنماؤں اور اہم شخصیات سے ملاقاتیں کیں۔
وزیراعظم کی وطن واپسی پر اسلام آباد ایئرپورٹ پر وفاقی وزرا اور دیگر اعلیٰ حکام نے ان کا استقبال کیا۔ اس موقع پر وفاقی وزیر داخلہ محسن نقوی، وفاقی وزیر اطلاعات و نشریات عطا اللہ تارڑ اور وزیر مملکت برائے داخلہ طلال چوہدری بھی موجود تھے۔
دورہ اقوام متحدہ کے دوران وزیراعظم شہباز شریف نے جنرل اسمبلی کے اجلاس سے خطاب کرتے ہوئے امن، سلامتی، پائیدار ترقی اور بین الاقوامی تعاون سمیت مختلف اہم امور پر پاکستان کا مؤقف پیش کیا۔
وزیراعظم نے دورے کے دوران مختلف ممالک کے سربراہان، رہنماؤں اور اعلیٰ حکام سے ملاقاتیں بھی کیں، جن میں دوطرفہ تعلقات، علاقائی صورتحال اور باہمی دلچسپی کے امور پر تبادلہ خیال کیا گیا۔
شہباز شریف نے عالمی مالیاتی اداروں کے نمائندوں اور کاروباری شخصیات سے بھی ملاقاتیں کیں، جن میں پاکستان میں سرمایہ کاری کے فروغ، معاشی تعاون میں اضافے اور ملکی معیشت سے متعلق مختلف امور پر گفتگو ہوئی۔
