اسلام آباد: وزیراعظم شہباز شریف نے اسلامی تعاون تنظیم (او آئی سی) پر زور دیا ہے کہ وہ مسلم دنیا کو درپیش بڑھتے ہوئے مسائل، خصوصاً فلسطین اور مقبوضہ جموں و کشمیر کے معاملات پر محض سفارتی بیانات تک محدود رہنے کے بجائے زیادہ فعال اور مؤثر کردار ادا کرے۔
پیر کے روز پاکستان کے دورے پر آئے ہوئے او آئی سی کے نئے سیکریٹری جنرل اسماعیل ولد شیخ احمد سے ملاقات کے دوران وزیراعظم نے کہا کہ سیاسی اور انسانی بحرانوں سے نمٹنے کے لیے مسلم ممالک کو زیادہ مضبوط اور مربوط حکمت عملی اپنانے کی ضرورت ہے۔ او آئی سی کے 57 رکنی ادارے کے سربراہ کی حیثیت سے ذمہ داریاں سنبھالنے کے بعد یہ ان کا پاکستان کا پہلا دورہ ہے۔
وزیراعظم شہباز شریف نے اسماعیل ولد شیخ احمد کو عہدہ سنبھالنے پر مبارکباد دیتے ہوئے کہا کہ رکن ممالک کی جانب سے متفقہ انتخاب ان پر اعتماد کا اظہار ہے۔ انہوں نے یقین دلایا کہ پاکستان او آئی سی کی حمایت جاری رکھے گا اور مسلم ممالک کے مشترکہ مفادات کے فروغ کے لیے فعال کردار ادا کرے گا۔
او آئی سی کے سیکریٹری جنرل نے علاقائی امن اور استحکام کے فروغ کے لیے پاکستان کی کوششوں کو سراہا۔ ملاقات میں عالمی سطح پر او آئی سی کے مؤثر کردار، رکن ممالک کے درمیان رابطوں اور مشترکہ سیاسی و انسانی مسائل سے نمٹنے کے لیے تعاون بڑھانے کے طریقوں پر بھی تبادلہ خیال کیا گیا۔
دونوں رہنماؤں نے فلسطینی اور کشمیری عوام کی حمایت کا اعادہ کرتے ہوئے کہا کہ ان کے مسائل او آئی سی کے سفارتی ایجنڈے کی اہم ترجیحات میں شامل ہیں۔